بەفەرمانی سەرۆكوەزیران سەرجەم یەكە سەربازییەكانی عیراق خرانە حاڵەتی ئامادەباشییەوە

نوسینگەی سەرۆکوەزیرانی عیراق

عەلی زەیدی، سەرۆكوەزیران و فەرماندەی گشتی هێزە چەكدارەكانی عیراق

لەپێناو رێگریكردن لە هەر هەڵسوكەوتێكی نابەرپرسانەو پاراستنی ئاسایشی ناوخۆ لەبەرامبەر هەوڵە دەرەكییەكان بۆ خستنە ناو ململانێكانەوە، بە فەرمانی سەرۆكوەزیران و فەرماندەی گشتیی هێزە چەكدارەكانی عیراق، سەرجەم یەكە سەربازییەكان خرانە حاڵەتی ئامادەباشییەوەو جەخت لەسەر بەهێزكردنی سیستەمەكانی بەرگریی ئاسمانی كرایەوە.

سەباح نوعمان، وتەبێژی فەرماندەی گشتی هێزە چەكدارەكانی عیراق، رایگەیاند: بە فەرمانی عەلی زەیدی، سەرۆكوەزیران و فەرماندەی گشتی هێزە چەكدارەكانی عیراق، تەواوی یەكە سەربازییەكان خرانە حاڵەتی ئامادەباشییەوە.

راشیگەیاند: ئەم هەنگاوە بەمەبستی بەر گرتنە لەهەر كردارێكی تاكەكەسی یان جموجۆڵێكی نابەرپرسانە لە دەرەوەی چوارچێوەی فەرماندەیی گشتیی هێزە چەكدارەكانی عیراق.

وتەبێژی فەرماندەی گشتی ئاماژەی بەوەشكرد: دەبێت پەلەبكرێت لەدابینكردن و پڕچەككردنی تایبەت بە سیستەمەكانی رادار و دۆزینەوەی پێشوەختە و بەرگریی ئاسمانی، چونكە پاراستنی ئاسایشی ناوخۆ بە تەواوی ئەرك و بەرپرسیارێتیی تایبەتی دامەزراوە سەربازی و ئەمنییەكانی دەوڵەتە.

سەباح نوعمان راشیگەیاند: هەندێك لایەنی دەرەكی هەوڵدەدەن خاك و ئاسمانی عیراق بخەنە ناو هاوكێشە و ململانێكانەوە، بەڵام سیستەمە سەربازی و ئەمنییەكانی عیراق بە بەرزترین ئاستی رێخراوەی و ئامادەیییەوە مامەڵە لەگەڵ پێشهاتەكاندا دەكەن.

PUKMEDIA