قوباد تاڵەبانی: یەكخستنەوەی هێزەكانی پێشمەرگە هەنگاوێكی مێژووییە

راگەیاندنی قوباد تاڵەبانی

ڕێوڕەسمى ڕاگەیاندنى یەکخستنەوەى هێزەکانى پێشمەرگە

قوباد تاڵەبانی رایدەگەیەنێت: كە یەكخستنەوەی هێزەكانی 70 و 80ی پێشمەرگە لەژێر چەتری وەزارەتی پێشمەرگەدا هەنگاوێكی مێژووییە و جەختیش دەكاتەوە لە بەردەوامی پشتیوانییەكانیان بۆ دوورخستنەوەی هێزەكان لە دەستوەردانی سیاسی و حزبی.

قوباد تاڵەبانی، جێگری سەرۆكوەزیرانی هەرێم رایگەیاند: یەكخستنەوەی هێزی پێشمەرگە و بەدامەزراوەیی كردنی و دروستكردنی هێزێكی راهێنراوی پیشەیی داواكاری و خواستێكی لەمێژینەی كۆمەڵانی خەڵكی كوردستانە و ساڵانێكی زۆریشە هەوڵی بۆ دەدەین. هەربۆیە یەكخستنەوەی هێزەكانی 70 و 80ی پێشمەرگە و رێكخستنەوەیان لەژێر چەتری وەزارەتی پێشمەرگە هەنگاوێكی مێژووییە و باشترین رێزلێنانە لە خەبات و قوربانیدانی پێشمەرگە.

ئاماژەی بەوەشكرد: بەم بۆنەیەوە لە دڵەوە پیرۆزبایی لە هێزی پێشمەرگەی كوردستان دەكەم و دڵنیاشیان دەكەینەوە بۆ لەمەودواش بە هەموو توانامانەوە پشتیوانیان دەبین و كار دەكەین بۆ ئەوەی دووریان بخەینەوە لە هەرچەشنە دەستێوەردانێكی سیاسی و حیزبی. سوپاسی هاوپەیمانەكانیشمان دەكەین كە لە چەند ساڵی رابردوودا زۆر هاوكارمان بوون بۆ گەیشتن بەم ئامانجە پیرۆزە.

PUKMEDIA