وەزارەتی نەوتی عیراق: رۆژانە 2.6 ملیۆن بەرمیل نەوت هەناردە دەکرێت

واع

هەناردەی نەوتی عیراق

وەزارەتی نەوتی فیدڕاڵی رایگەیاند کە پاڵاوگە نیشتمانییەکان بە تەواوی توانای بەرهەمهێنانیانەوە کار دەکەن و کۆگای ستراتیژیی سووتەمەنی رێکخراوە، ئاشکراشی کرد  هەناردەکردنی نەوت گەیشتووەتە 2.6 ملیۆن بەرمیل لە رۆژێکدا.

سەلیم رووکابی وتەبێژی وەزارەتی نەوت، ئاشکرای کرد: ئەنجامدانی گرێبەستی درێژخایەن بۆ دابینکردنی بەنزینی موحەسەن و گازوایل بە مەبەستی پڕکردنەوەی پێداویستیی ناوخۆ و بەهێزکردنی کۆگای ستراتیژییە.

وتەبێژی وەزارەتی نەوت ئەوەشی  ئاشکرا  کرد کە پلانیان هەیە لە رێگەی فراوانکردنی پاڵاوگەکانی دیوانییە و میسانەوە توانای پاڵاوتن زیاتر بکەن.

لە بارەی هەناردەکردنیشەوە، سەلیم رووکابی وتەبێژی وەزارەتی نەوت، ئاشکرای کرد: لە رێگەی باشوری وڵاتەوە، نزیکەی دوو ملیۆن و 400 هەزار بەرمیل هەناردە دەکرێت، کە ئەم بڕەش کاریگەری گرژییەکانی ناوچەکە و داخستنی گەروی هورمزی لەسەرە.
وتیشی: نزیکەی 200 هەزار بەرمیلیش لە رێگەی دەروازەکانی هەرێمی کوردستانەوە هەناردە دەکرێت.

PUKMEDIA