Qubad Talebanî: Şanaziyê bi stafa nexweşxaneya Hîwa dikim

Ragihandina Qubad Talebanî

Qubad Talebanî û Dr. Haje Ebdulah

Cîgirê Serokwezîrê Herêma Kurdistanê Qubad Talebanî, bi boneya bidestxistina bilindtirîn pileya zanistî di warê nexweşiyên penceşêrê de wekî yekem jin li ser asta Îraqê, pesnê rola mirovdostane û zanistî ya mezin a Dr. Haje Ebdulah da, û ew wekî mînakek serbilind ji bo jinan û hemû lêkolerên zanistê bi nav kir.

Di dema pêşwazîkirina Dr. Haje Ebdulah de, bi amadebûna rêveberê Nexweşxaneya Hîwa ya çareserkirina nexweşên penceşêrê li Silêmaniyê, Qubad Talebanî bîranîna xebatên pêşeng ên Dr. Haje anî ziman û got: Di sala 2002an de pêşeng bû di vekirina yekem beşa penceşêrê de di tenduristiya Silêmaniyê de ku paşê bû binesaziyeke xurt ji bo avakirina Nexweşxaneya Hîwa, ji wê demê ve heta niha bi hemî dilsozî û coşê ve xizmeta nexweşên penceşêrê dike, ligel heval û hevpîşeyên xwe hêviya jiyanê ji bo bi hezaran kesan vegerandiye. Lewra hemû kes ji wan hez dikin û serbilindiyê pê re dikin û navê Dr. Haje ji bo nexweşên penceşêrê û malbatên wan wateya pêbawerî, hêvî û berdewamiya jiyanê dide.

Her weha Cîgirê Serokwezîr tekez kir ku, niha Dr. Haje wekî yekem jine li ser asta Îraqê bilindtirîn pileya zanistî di warê penceşêrê de bi dest xistiye, hemû kurd û bi taybetî jî jin pê serbilind in.

Qubad Talebanî got jî: Di gel erka giran a rojane di çareserkirina nexweşan de li Nexweşxaneya Hîwa, hewldana bêwestan di bilindkirina asta zanistî de û encamdana lêkolîneke bi nirx, mînakek bilind û mezin e ji bo jinan û hemû xwendekarên zanistê.

Qubad Talebanî kêfxweşiya xwe bi hevdîtina bi Dr. Haje re anî ziman û got: Ez bi rûmet bûm bi dîtina wê şad bûm û em pê serbilind in. Em pê bawer in ku heta were dê mînakên din jî zêde bibin. Ez pîrozbahiyê li wê û hemû hevpîşeyên wê yên dilsoz û staf û rêveberê Nexweşxaneya Hîwa dikim û em bi hemûyan serbilind in.

PUKMEDIA