وەزارەتی خوێندنی باڵا رێکاری رەفتاریی پیشەیی مامۆستایان و خوێندکارانی زانکۆ بڵاودەکاتەوە

PUKMEDIA

وەزارەتى خوێندنى باڵاو توێژینەوەى زانستى

وەزارەتى خوێندنى باڵاو توێژینەوەى زانستى ڕێکاری رەفتاری پیشەیی مامۆستایانی زانکۆ و رەفتاری خوێندکارانی زانکۆ بڵاوکردەوە و رایگەیاند: ئەگەر مامۆستای زانکۆ هاوسەرگیری لەگەڵ خوێندکاری خۆی لە کاتی ماوەی خوێندندا ئەنجام بدات، پێویستە مامۆستاکە بگوازرێتەوە بۆ دەرەوەی بەش و کۆلێژ مافی وانه وتنەوەی لەو بەشه نابێت.

دەشڵێت نابێت، پەیوەندی تەلەفونی لەنێوان مامۆستا و خوێندکاردا هەبێت و بەڵکو  لەرێگەی پلاتفۆڕمە رەسمییەکانی زانکۆوە دەبێت.

 هەر بەپێی رێکاری پیشەیی خوێندنی باڵا، دروستکردنی پەیوەندی سۆزداری و هەراسانکردنی سێکسی قەدەغەیە

هاوکات، وەزارەتی خوێندنی باڵا، چەند رێکارێکی پیشەیی بۆ خوێندکارانیش بڵاوکردووەتەوە، کە ئەوانیش پێویستە پابەندی بن و پەیوەندی سۆزداری لەگەڵ مامۆستا دروست نەکەن ، هەروەها بە هەوڵ و کۆششی خۆی نمرە بەدەستبهێنێت و پەنا بۆ رێگای نازانستی نەبات.

دەشڵێت: پێویستە رێز لە مامۆستا بگرێت و هەڵسوکەوتی نەشیاو ئەنجام نەدات، هەروەها لە پۆشینی جل و بەرگردا رەچاوی ئادابی گشتی بکات.

وەزارەتی خوێندنی باڵا، ئامانجی ئەم رێکارەی روونکردووەتەوەکە بۆ پاراستنى بەرژەوەندی گشتى و فەراهەمکردنى شەفافیەت و یەکسانى و دادپەروەرى و دیاریکردنی ئاکار و رەفتارى پیشەیی رەسەن لە نێوان مامۆستایانی زانکۆ و رەفتاری خوێندکاران لە قۆناغەکانى پڕۆسەى خوێندندا، لە گشت زانکۆ و ئەنجومەن و دەستە و کۆلێژی زانکۆیی و پەیمانگە حکومی و تایبەتەکانی هەرێمی کوردستان.

دەقی  ڕێکاری رەفتاری پیشەیی مامۆستایانی زانکۆ خوێندکاران لەم لینکەدایە.

PUKMEDIA