Ji Bakurê Sûriyê heya Rojavayê Kurdistanê.. Zimanê BBC û dengê BKC

Jîner Muhemed

Erdnîgariya Rojava berhema xwîn û xebatek dirêj ku 14 salan maye ye,lê bingehên vê ezmûnê di qirkirineke navneteweyî û herêmî de nêzîkî sînorê şikestin û piçûkbûnê dibin, helbet, piçûkbûna Bakurê Sûriyê û windakirina nêzîkî (40%) ji qada erdnîgarî nayê wê wateyê nemana Rojava, wekî ku (Dilbixwîn) nivîsandiye: Kurd li beşê ku hatiye dagirkirin erkê parastina Bakurê Sûriyê bêpar tên hiştin, lê kes nikare axa Rojava ji wan bistîne.

Ezmûna Rojava ya hatiye  bidestxisitin di şiroveya medyayê û navendên lêkolînê de wekî têkçûnek leşkerî hatiye bi navkirin, lê rastî ew e ku hêz û mezinahiya qirkirinê ne wekheve û çênabê ku dabeşbûna di navbera eşîrên Ereb yên di HSDê de wekî têkçûna Kurd û hêzên çekdar yên wê beşê were şîrovekirin,li şûna wê,li kêleka paşvekişîna leşkerî,em dikarin li ser têkçûna teza hizra ya jiyana bi hevre ya aştiyane ya neteweyan di herêmeke xweser de biaxivin,ev teza li ser Partiya Yekîtiya Demokratîk (PYD) û tevgera Kurd ya li herêmê di destpêka Bihara Erebî de ji bo medyaya navneteweyî bibû modelek balkêş, lê, wisa xuya dike ku ramana pêkhateya Ereb li Sûriyê, bi taybetî li Dêra Zor û Reqayê, hîna ne gihîştiye wê astê ku bikaribe ji meylên têkçûna yên Şovenîst veqetîne û bi hevre di bin sîwanekê de bi aştiyane bijî, ji ber vê yekê, pêwîste Kurd li herêmê vegerin ser teza xwe ya kevin ku Rojava ji xalên hevpar yên bi Ereban re vala ye.

Bi destpêkirina Bihara Erebî û azadbûna beşek mezin ji Sûriyê, li jêr ronahiya tezên Ocalan, vebijarka rast avakirina civakek demokratîk bû ku cihêrengiya civakên xwe nas bike, divê hikûmet û federasyonek were damezrandin ku serî li çareseriyên leşkerî an otorîter nede û binemayê diyalog, lihevkirin û hevkariyê divê çavkaniya pêkhatin be û hêzên çekdar jî li ser heman bingehê werin pêk anîn, wê ezmûnê 14 salan berdam kir û bû şêweyekî dewletbûnê, lê bi peymana veşartî ya kurên eşîra Begare, êl û eşîrên din û hevkariya wan bi Artêşa Şereh re, selimand ku tenê tiştê dikare hêza parastinê bide Kurdên wan herêman, yekîtiya hêzên wan yên çekdar e, ji ber vê yekê, di qonaxa bê de, dibe ku em dîsa bi navên YPG û YPJê nas bibin, ku ev jî xuyangeke Kurdî ya tevgera çekdarî li wê beşê ye.

Bê dengiya civaka navneteweyî û bê dengiya medyaya navneteweyî belgeyek eşkere ye ku çekên me demek dirêj e li ser navê danûstandinan bê deng in, lê ji bo ku cîhan li te binêre, divê em bîr li gotinên şervan bikin  ku dibêjin: Ji bo ku  dengê BBC li ser te be, divê BKC di destên te de be.

PUKMEDIA