Di bîranîna koçkirina Serok Mam Celal de

Hişmend Şêxo

Bi babeta bîranîna Nehemîn koçkirina serok Mam Celal ez vê kurte nasînê li ser rêveçûna wî ya xebatkarî diyarî xebatkarên "Yekîtî Niştimanî Kurdistan" û "Partiya Pêşverû" dikim, herwiha ez diyarî hemû hezkiriyên serok Mam Celal dikim.

Heval Mam Celal di / 12 / 11 / sala 1933an de, li Başûrê Kurdistanê li gundê Kelekan ya ser bi navçeya Koyê girêdayî Dukanê ve ji dayîk bûye.

Xwendina xwe ya destpêkê û navîn li Koyê û ya lîseyê li Hewlêr û Kerkûkê qedandiye.

Di buhara jiyana xwe de Talebanî derbazî nav xebata rêzanî bûye, ew di sala 1951.an de weke Endamê Komîta Navendî ya PDK’ê hate hilbijartin.

Di 1953.an de wî li zanîngeha Bexdayê dest bi xwendina zagonsaziyê kiriye û digel hinek hevalên xwe yên xwendekar Yekîtiya Xwendekarên Kurdistanê damezrandiye.
Di sala 1956.an de ji ber xebata xwe ya rêzanî dest ji xwendinê berda.

Di sala 1961.an de digel Mile Mistefa Barzanî dest bi şerê çekdarî kir, piştre ji ber cudabûna bîr û baweriyên rêzanî di navbera wî û Barzanî de di sala1964.an de ji PDK cuda bû û "Partiya Şoreşgerî ya Kurdistanê" damezirand.
Piştî têkçûna Peymana 11’ê Avdarê di navbera Kurdan û hikûmeta Îraqê de di sala 1975.an de, Mam Celal û hejmarek ji tekoşer û pêşengên Kurd "Yekîtî Niştimanî Kurdistan" damezrandin.

Yekîtî Niştimanî Kurdistan di rewş û heyamek zor dijwar de ji bin kulxan û aloziyên bedbîniyê bi rêbertiya heval Mam Celal bi rêket , piştî salekê ji damezrandina xwe şoreşa Kurdî ya nûjen li seranserî Kurdistana Îraqê ragihand û Agirê Rizgariyê li dijî Sedam Hisên û rêjîma wî ya faşî barand.

Di wê xebata şoreşgerî de destanên qehremane hatin xêzkirin û ji nûve hêviyên gelê Kurd li her çar parçeyên Kurdistanê bilind kirin.

Encam û berhema vê şoreşê Rizgariya Kurdistana Başûr û avakirina sîstemeke federal bû.

Heval Mam Celal, Mamoste û Pêşmergeyê gelê xwe bû

wek hemû kes dizane ku di sala 1991.an de li bajarê Raniye , li başûrê Kurdistanê, raperîneke dîrokî li dijî rêjîma Beis rabû, di encamê de gelê Kurd dikarî hemû bajar û bajarokên Herêma Kurdistanê rizgar bikirana û gelek pakrewanên mezin pêşkêşî wê serhildana dîrokî kirin;lê di rastiya wê de, endazyarê wê di cîbicîkirina wê de bi hemû hêz û şiyana xwe herdem amade bû.

 Her weha endazayarê wê raperînê jî heval Mam Celal bû ku dikarî di nav dilê gel de cih bigre û mil bi milê gelê xwe ve li hemû bajaran bigere û moralê bide cemewerê serhildêr.

Ew pêngaveke dîrokî bû, her wiha xebateke pîroz bû, dema ku mirov li ser wî çi bêje û çi binivîse her kêm dibêje ji ber ku dikarî bi nasnameya xwe ya Kurdayetî û ya şoreşgerî û pêşmergeyetî ve ji çiyayên Kurdistanê me bibe koşka komariya ku biryara bidarvekirinê li dijî wî derxistibû û ji hemû Îraqiyekî re lêborîn derxistibû ji bilî serok Mam Celal.

Peywendiyên me bi heval Mam Celal re

Peywendiyên herdu partiyên me (Partiya Demoqrat ya Pêşverû ya Kurd li Sûriyê , û Yekîtî Niştimanî Kurdistan) pweywendiyên dîrokî ne bi dirêjahiya salan berdewam kiriye û endezyarên wan peywendiyan herdu hevalên cefakêş û nemirin heval Hemîd Derwîş û heval Mam Celal e, bi dirêjahiya salan herdu partiyên bira tekez kirine li ser piştgiriya doza netewî ya kurdî li her çar parçeyên Kurdistanê û rêzgiritina taybetmendiya doza netewî ya Kurdî li Kurdistana Sûriyê, di vê derbarê de gelek karin hevbeş me bi hevre kirine wek komîta hevrêziya Kurdistanî û bereya kurdistanî di sala (1980).an de ya ku partiya me , Yekîtî Niştimanî Kurdistan , Partiya Sosyalîst ya Kurdistan , Partî Demoqrat ya Kurdistan a îranê têde cih digrtin bi amedebûn û çavdêriya herdu partiyên Komonîst ya Sûrî û Îraqî.

Rola heval Mam Celal berçav bû di nêzîkbûna aliyên Kurd û yekrêziya Kurdî de.

Heval Mam Celal hevalekî cefakêş , dilsoz û hişmend bû, bi dirêjahiya salan di xebata xwe ya partîzanî de rastî gelek êş û azaran hat û bi salan ew ji welêt koçber bû û li xerîbiyê penaber bû, rêjîma faşist biryar nedida ku Mam Celal vegere ser axa niştîman , lewre piştî rûxandina rêjîma Sedam Hisên û dema ku tevgera rêzaniya Îraqî bi seranser û ya Kurd jî di nav de Mam Celal hilbijartin wek serokê komara Îraqa federal wê demê hêviyên miletê me bilind kirin û bandora wê ya erênî ne tenê li ser partiya wî û Kurdistana Başûr bû , bandora wê ya erênî li ser hemû parçeyên Kurdistanê bû.

Di bîranîna Nehemîn ji koçkirina wî bi dilekî xemgîn ez dibêjim :Mam Celal tu namirî û tê herdem di dîroka gelê xwe de bijî,mirina Mamê me ne tenê zirara Yekîtî Niştimanî Kurdistan û Kurdistana Başûr bû û hew , lê belê mezintirîn zirar bû ji her çar parçeyên Kurdistan û ji tevahiya Tevgera Azadîxwaza Kudistanê re.

Bila serê gelê Kurd xweş be

Bila xebatkarên Yekîtî Niştimanî Kurdistan xweş bin

Sed silav li giyanê te ey mîrê diplomasiya kurdî

Heleb /03 / 10 / 2026 Z - 2638 K

*Endamê Komîta Navendî ya
Partiya Demoqrat ya Pêşverû ya Kurd li Sûriyê

PUKMEDA