وەزارەتی دارایی عیراق لە دابەشکاری مووچەوە دەبێتە داڕێژەری ئابوری

واع

عەلی زەیدی سەرۆکوەزیرانی عیراق لە وەزارەتی دارایی

عەلی زەیدی سەرۆکوەزیرانی عیراق، داوای گۆڕینی سیستەمی ئابوری و کاری وەزارەتی دارایی دەکات ، ڕاوێژکارێکی دارایش رایدەگەیەنێت: وەزارەتەکە ڕۆڵێکی گەورە دەگێڕێت لە گۆڕینی سیستمی ئابوریی وڵاتدا و چیتر وەزارەتێک نابێت کە تەنها مووچە دابەش بکات.

مەزهەر محەمەد ساڵح، ڕاوێژکاری دارایی سەرۆکوەزیرانی عیراق، بە ئاژانسی هەواڵەکانی عیراقی راگەیاند: ڕاسپاردنی وەزیری دارایی لەلایەن عەلی زەیدی سەرۆک وەزیرانەوە بۆ ئەوەی ببێتە جێگری ئەو لە سەرۆکایەتیکردنی ئەنجومەنی وەزاری بۆ ئابووری، لەگەڵ فەلسەفەی دەوڵەتی هاوچەرخ و فەلسەفەی حکومەتی نوێدا دەگونجێت، چونکە وەزارەتی دارایی وەزارەتێکی ئاسایی نییە، بەڵکو وەزارەتێکی سیادییە و کار لەسەر پلانداڕشتن و بونیادنانی داهاتووی ئابوری عیراق دەکات.

دەشڵێت: گۆڕانکارییەکی دامەزراوەیی لە حکومەتدا لە ئارادایە،گۆڕانکاریەکەش لەکارەکانی وەزارەتی دارایدا، بەو پێیەی وەزارەتەکە گەورەترین ڕۆڵ دەبینێت لە گۆڕینی فەلسەفەی سیستمی ئابووری و دروستکردنی هاوبەشی لە نێوان دەوڵەت و بازاڕدا.

 ئاماژەی بەوەشکرد: سەرۆکوەزیرانی عیراق، داوای لە وەزارەتی دارایی کردووە پلانێکی درێژخایەن ئامادە بکات و  کاری خۆی لە دابەشکەری مووچە و کرێ و خەزنەدارەوە بگۆڕێت بۆ وەزارەتێک کە پلانی ئابوری درێژخایەن دابنێت و کاری تەنها دابەشکردنی مووچە نەبێت.

ڕاوێژکاری دارایی سەرۆکوەزیرانی عیراق، باسی لەوەشکرد: ئەوەی وەزارەتی دارایی پلانی بۆ دادەنێت و هەوڵی جێبەجێکردنی دەدات، لە ناو ئەنجومەنی وەزاری ئابورییەوە جێبەجێ دەکرێت، ئێمەش هەوڵدەدەین لە ئامرازێکی ڕووبەڕووبوونەوەی بارودۆخە سەختەکانەوە بیگۆڕین بۆ داڕشتنی سیاسەتی ئابوری و جێبەجێکردنی پلانە ئابورییەکان، بۆ ئەوەی لەم رێگایەوە پێکهاتەی ئابوری عیراق بگۆڕین.

پەیوەست بەوەی ئەم گۆڕانکارییە لە کوێوە دەستپێدەکات، مەزهەر محەمەد ساڵح، ڕاوێژکاری دارایی سەرۆکوەزیرانی عیراق، رایگەیاند: لە دیوانی چاودێری داراییەوە دەستپێدەکات تا دەگاتە وەزارەتە بنەڕەتییەکانی وەک پیشەسازی و کشتوکاڵ و هەروەها چاودێریکردنی بازاڕی دارایش لەخۆ دەگرێت.

PUKMEDIA