گەورەترین فێستیڤاڵ بۆ دووەمین رۆژ لە سلێمانى بەردەوام دەبێت

کەناڵ8

فێستیڤاڵی سولی فێست لە هەواری شار بەڕێوەدەچێت

ئەمڕۆ 27ی6ی2026، فێستیڤاڵی سولی فێست كە گەورەترین فێستیڤاڵە لەسەر ئاستی عیراق و هەرێمی كوردستان لە پاركی هەواری شارى سلێمانی بۆ دووەمین رۆژ بەڕێوەدەچێت و ماوەی هەشت رۆژ دەخایەنێت کە تیایدا  زیاتر لە 100 چالاکیی جۆراوجۆر پێشکەش دەکرێن.

فێستیڤاڵەكە تایبەت دەبێت بە خستنەڕووی كار و چالاكیی تەواوی كەلتوورە جیاوازەكان و داهێنانەكان، كە بە بەشداریی ژمارەیەك لە گەنجانی شاری سلێمانی، تەواوی هەرێمی كوردستان و عیراق، كۆمپانیا و بازرگانەكان بەڕێوەدەچێت و ماوەی هەشت رۆژ دەخایەنێت و تاوەكو 3ی7ی2026 بەردەوامدەبێت و رۆژانە لە سەعات 4 بۆ 12ی شەو كار و چالاكییەكان بەڕێوەدەچن.

ئامانجی سەرەکیی فێستیڤاڵی سولی فێست بۆ راکێشانی زۆرترین گەشتیارە بۆ شاری سلێمانی، کە چاوەڕوان دەکرێت زیاتر لە 500 هەزار کەس سەردانی فێستیڤاڵەکە بکەن.

هاوکات، فێستیڤاڵەکە بۆ چوار زۆنی سەرەکی دابەشکراوە، کە بریتین لە: زۆنی سەرەکی (170 کۆمپانیا)، زۆنی شانۆی رۆمانی بچووک، زۆنی منداڵان و زۆنی شەقامەکە، کۆی گشتی 270 کۆمپانیا و براند لە تەواوی زۆنەکاندا بەشدارن.

هەر لە  فێستیڤاڵەکەدا ژمارەیەکی بەرچاو لە خوێندکار و منداڵی خوێندنگا و باخچەکان لە فێستیڤاڵەکەدا ئامادە دەبن و چالاکیی تایبەت بە خۆیان دەبێت، بەشێوەیەک لە ماوەی ئەو 8 رۆژەدا، زیاتر لە 100 چالاکیی جۆراوجۆر لە بوارەکانی تەندروستی، وەرزشی، کولتووری، پەروەردەیی، رۆشنبیری و خێزانی پێشکەش دەکرێن.

PUKMEDIA