مووچەی هەرێم لەنێوان نەبوونی پارەی كاش و نەناردنی داهاتدا پەكخراوە

PUKMEDIA

ديناری عیراقی

ئەندامێكی ئەنجومەنی نوێنەران رایدەگەیەنێت، هۆكاری سەرەكی نەناردنی مووچەی مانگی شەشی فەرمانبەرانی هەرێم بۆ نەبوونی رێككەوتنی كۆتایی و نەناردنی داهاتی نانەوتی لەلایەن هەرێمەوە دەگەڕێتەوە، نەك كەمی پارەی كاش لەعیراق، ئاماژە بەوەش دەكات كە هەرچەندە وەزیری دارایی عیراق بەڵێنی ناردنی مووچەی مانگی شەشی داوە، بەڵام هێشتا كاتەكەی دیاریی نەكراوەو ئاسۆی دابەشكردنی ناڕوونە.

ئاسۆس عەلی، ئەندامی فراكسیۆنی یەكێتی، لەئەنجومەنی نوێنەرانی عیراق، بەوێبساتی یەكێتیی نیشتمانیی كوردستان PUKMEDIA ی راگەیاند: هەرچەندە دابەشكردنی مووچە لەهەرێمی كوردستان 40 رۆژی تێپەڕاندووە، بەڵام تاوەكو ئێستا ئاسۆی دابەشكردنی مووچە نادیارە، چونكە وەزیری دارایی عیراق، لەكۆبوونەی لەگەڵ لیژنەی دارایی ئەنجومەنی نوێنەراندا رایگەیاندبوو، مووچەی مانگی شەشی مووچەخۆرانی هەرێم دەنێرین، بەبێ ئەوەی كاتی ناردنەكەی دیاریی بكات.

ئەوەشی خستەڕوو: راستە لەعیراق كێشەی دارایی و كەمی پارەی كاش هەیە، بەڵام ئەوە هۆكاری نەناردنی مووچەی مانگی شەشی مووچەخۆرانی هەرێم نییە، بەڵكو بەشێكی كێشەكە نەگەیشتنە رێككەوتنی حكومەتی عیراق و  هەرێم و  نەناردنی داهاتی نانەوتییە لەلایەن هەرێمی كوردستانەوە.

ئەندامەكەی فراكسیۆنی یەكێتی راشیگەیاند: وەزیری دارایی عیراق ئاماژەی بەوەشكردووە، بۆ مووچەی مانگەكانی دیكە، پێویستە لەگەڵ حكومەتی هەرێمی كوردستان بگەنە رێككەوتنی تەواوەتی، بۆئەوەی چیتر كێشە بۆ مووچەی مووچەخۆرانی هەرێم دروست نەبێت.

ئەمەش لەكاتێكدایە، وەزارەتی دارایی هەرێمی كوردستان، رۆژی 26ی5ی2026، مووچەی مانگی ئایاری دابەشكرد، كە هاوكات بوو لەگەڵ جەژنی قوربان، لەدوای ئەو رێكەوتەشەوە تائەمڕۆ 9ی7ی2026 مووچە دابەشنەكراوە و كاتی ناردنیشی لەلایەن عیراقەوە دیار نییە، بەمەش مووچەخۆران دەبێت زیاتر لەچاوەڕ‌وانی هاتنی مووچەدابن كەنزیكەی 45 رۆژە مووچەیان وەرنەگرتووە.

PUKMEDIA