شێخ جەعفەر شێخ مستەفا پێشوازی لە قوباد تاڵەبانی دەکات

نوسینگەی رۆژنامەوانی شێخ جەعفەر شێخ مستەفا

شێخ جەعفەر شێخ مستەفا و قوباد تاڵەبانی

ئەمڕۆ دووشەمە 13ی تەمووزی 2026، شێخ جەعفەر شێخ مستەفا، لێپرسراوی ئەنجومەنی پاراستنی بەرژەوەندییە باڵاکانی یەکێتیی نیشتمانیی کوردستان، لە بارەگای ئەنجومەن، پێشوازیکرد لە قوباد تاڵەبانی جێگری سەرۆکی حکومەتی هەرێمی کوردستان و لێپرسراوی مەکتەبی سکرتاریەتی سەرۆک مام جەلال.

لەدیدارێکدا کە ژمارەیەک لە هەڤاڵانی ئەنجومەن ئامادەیبوون، تیشکخرایە سەر گەشتە سەرکەوتووەکەی جێگری سەرۆکی حکومەت بۆ وڵاتانی تورکیا و ئەلبانیا کە رۆڵی بەرچاوی دەبێت لە پتەوکردنی رایەڵەی پەیوەندییە هەمەلایەنەکانی نێوان هەرێم و تورکیا لەلایەک و هەرێم و ئەلبانیا لەلایەکی تر.

هاوکات، باس لەدوا پێشهاتەکانی دۆخی هەرێم و ناوچەکە کرا و لەو رووەوە جەخت لەسەر پێگەی گرنگی یەکێتی و پەیوەندییە فراوانەکانی لەسەر هەرسێ ئاستی کوردستان و عیراق و ناوچەکە کرا و هەردوولا هاوڕابوون لەگەڵ ئەوەی یەکێتی لە چەند ساڵی رابردوودا بووەتەوە بە حیزبی جێی ئومێدی خەڵکی کوردستان، بەڵام دەبێت بۆ لەمەودوا زۆر زیاتر لە جاران لە چین و توێژە جیاوازەکانی خەڵکی کوردستان نزیکتر ببینەوە.

لەو چوارچێوەیەشدا تێڕوانینی یەکێتی سەبارەت بە بایەخی پێشکەشکردنی خزمەتگوزاری پێویست بەدانیشتوانی هەرێم دووپاتکرایەوە، بەچەشنێک کە شایستەی خۆڕاگری و قوربانییەکانی کۆمەڵانی خەڵک بێت.

هەر لەو دیدارەدا، هەڤاڵ شێخ جەعفەر، کۆپییەکی لە کتێبی ( کڵپەی ژێر خۆڵەمێش) کە بیرەوەرییەکی شیکاریی خۆیەتی، پێشکەش بە قوباد تاڵەبانی کرد.

PUKMEDIA