مەکتەبی سیاسی یەکێتی پەیامێکى پیرۆزبایى ئاڕاستەى زانکۆى سلێمانى دەکات

PUKMEDIA

لۆگۆى یەکێتیى نیشتمانیى کوردستان و زانکۆى سلێمانى

مەكتەبی سیاسی یەكێتیی نیشتمانیی كوردستان لە پەیامێکیدا بۆ یادی پەنجا و هەشت ساڵەی دامەزراندنی زانكۆی سلێمانیدا پیرۆزبایی ئاڕاستەی سەرۆك و مامۆستایان و خوێندكارانی زانكۆ دەكات.

دەقى پەیامەکە:

لەیادی پەنجاو هەشت ساڵەی دامەزراندنی زانكۆی سلێمانی زانكۆی دایك لە كوردستاندا ، پیرۆزباییەكی گەرم ئاراستەی سەرۆك و مامۆستایان و خوێندكارانی زانكۆ دەكەین

زانكۆی سلێمانی لەسەر پێشنیار و داوای سەرۆك مام جەلال لە ٢٣ی تشرینی یەكەمی ساڵی ١٩٦٨ دامەزرا و بوە ناوەندێكی زانستیی و فەرهەنگی كە تێیدا چەندین كادری لە ڕشتە جیاوازەكاندا بۆ خزمەتی وڵات پێگەیاند و وەكو مەڵبەندێكی رۆشنبیریی لە گەشەكردنی بیری نوێخوازی و سیاسیدا لەسەرەتای حەفتاكانەوە تاوەكو ناوەڕاستی هەشتاكانی سەدەی رابووردو ، خوێندكاران و دەرچوەكانی بونە داینەمۆی بزوتنەوەی كوردایەتی پێشکەوتنخواز و لە ڕووبەڕووبونەوەی رژێمی بەعسدا ڕۆڵی پێشەنگیان بینیوە.

لە سەرەتاكانی ساڵی ١٩٩٢دا زانستخوازان و خەمخۆرانی شاری سلێمانی پێشنیاریان كرد زانكۆی سلێمانی دابمەزرێننەوە، نەك زانكۆی سەلاحەدین لە هەولێرەوە بگوازرێتەوە بۆ سلێمانی. بەمەش هەرێمی كوردستان بووە خاوەنی دوو زانكۆ ، بە باربۆ و دەخیلەی پاشەكەوتی کۆمەڵانی خەڵك، زانكۆی سلێمانی دامەزرایەوە.

گەشەسەندنی ئاستی زانستی و فەرهەنگیی ئەم چەند ساڵەی رابووردوی زانكۆی سلێمانی كە لە پێشەنگیی ڕیزبەندیی زانكۆكانی عیراق و ناوچەكە دا بە دەستی هێناوە جێی شانازیی هەموان بووە .

هەر لەم یادەدا دەستخۆشی لە زانكۆ دەکەین بۆ ئەو هەنگاوە نوێیەی لەگەڵ مەڵبەندی دراساتی گشتی بۆ بە زانستیكردنی پرسە مێژووییەكانی گەلەكەماندا گرتایەنەبەر لە رێی سازکردنی كۆنفرانسی نێودەوڵەتی ( شۆڕشی نوێ لەباشووری كوردستان)دا

دووبارە پیرۆز بێت زانكۆی سلێمانیی

مەكتەبی سیاسی
یەكێتیی نیشتمانیی كوردستان


PUKMEDIA