نوێنەری قوباد تاڵەبانی هاوكاريی پزیشكی دەگەیەنێتە نەخۆشخانەی هیوا

PUKMEDIA

نوێنەری قوباد تاڵەبانی هاوكاری پزیشكی دەگەیەنێتە نەخۆشخانەی هیوا

نوێنەری قوباد تاڵەبانی، جێگری سەرۆكوەزیرانی هەرێم، بڕێك دەرمان و كەرەستەی پزیشكیی پێشكەش بە نەخۆشخانەی هیوا كرد،  بەڕێوەبەری نەخۆشخانەكەش رایگەیاند: یەكێتیی نیشتمانیی كوردستان و ئیدارەی گشتی، بەردەوام پشتیوانیی نەخۆشخانەی هیوان.

ئەمڕۆ 30ی 7ی 2026، ئارام قزلەریی، نوێنەری قوباد تاڵەبانی، جێگری سەرۆكوەزیرانی هەرێم، سەردانی نەخۆشخانەی هیوای كردو وێڕای دەستخۆشی لەبەڕێوەبەرو پزیشكان و خۆبەخشان و كارمەندانی نەخۆشخانەكە، بڕێكی باش دەرمان و كەرەستەی پزیشكی پێشكەش بە نەخۆشخانەی هیوا كرد.

راشیگەیاند: داوا لەسەرمایەداران و خاوەن كۆمپانیاكانی دەرمان دەكەم هاوكاری نەخۆشخانەی هیوا و تووشبووانی شێرپەنجە بكەن.

هاوكات دكتۆر یاد نەقشبەندی، بەڕێوەبەری نەخۆشخانەی هیوا رایگەیاند: یەكێتیی نیشتمانیی كوردستان و ئیدارەی گشتی، بەردەوام پشتیوانیی نەخۆشخانەی هیوا و خۆبەخشانیان كردووەو زیاتر لە 300 خۆبەخش لەسەر ئەو بڕە پارەیە دەوام دەكەن كە ئیدارەی گشتی بۆی تەرخان كردوون.

راشیگەیاند: بەردەوامین لە خزمەت كردن و لەداهاتوویەكی نزیكدا چەندین جۆری دیكەی پڕۆسەی زانستی بۆ تووشبووانی شێرپەنجە ئەنجامدەدەین، بەتایبەتی چاندنەوەی مۆخی ئێسك، لەكاتێكدا، نەخۆشخانەی هیوا تەنها نەخۆشخانەیە لەسەر ئاستی عیراق كە خزمەت بە تووشووانی تالاسیما دەكات.
 
دكتۆر یاد نەقشبەندی وتیشی: سوپاسی قوباد تاڵەبانی، جێگری سەرۆكوەزیرانی هەرێم دەكەین و هەوڵەكانی بۆ پشتیوانی لەنەخۆشخانەی هیوا و تووشبووانی شێرپەنجە بەرز دەنرخێنین.

ئاماژەی بەوەشكرد: نەخۆشخانەی هیوا موڵكی گەلەو هیوادارین هەمووان هاوكاربن، بەڵێن دەدەین لەسەر رێچكەی خزمەتكردن بە تووشبووانی شێرپەنجە بەردەوام بین و رێگەنادەین هیچ تووشبوویەكی شێرپەنجە لەهەرێم و عیراق بێ چارەسەر بمێنێتەوە.

PUKMEDIA