د.یوسف گۆران: یەکێتی مۆدێلێکی نوێی کاری حزبی و حکومی پەیڕەو دەکات

مەڵبەندی دیراساتی گشتی

بەشێکی کۆبونەوەکە

ئەمڕۆ 27ی8ی2026، د.یوسف گۆران لیێپرسراوی مەڵبەندی دیراساتی گشتی لە سلێمانی سەرپەرشتی کۆبوونەوەیەکی تایبەتی کرد، لەگەڵ هەڤاڵانی تیمی حکومەت لە پارێزگاکانی سلێمانی و هەڵەبجە بە ئامادەبوونی لێپرسراوی بۆردی حکومەت و ئەنجوومەنە هەڵبژێردراوەکان، سەمیر هەورامی و ژوان سابیر.

لە سەرەتای وتەکانیدا دکتۆر یوسف گۆران وتی: یەکێتی هەمیشە شانازی کردووە بە خزمەتکردنی کۆمەڵانی خەڵکی کوردستانەوە بەبێ جیاوازی و دەیەوێت کادیرانی خۆی لە پۆستە حکومییەکاندا زیاتر کارامە و ئامادە بکات.

 ڕوونیشکردەوە:لە ئێستادا یەکێتی لە پەیڕەو پرۆگرامی نوێی حزبدا ئەم بابەتەی چەسپاندووە جیاواز لە ڕابردووە.

لە بەشێکی دیکەی قسەکانیدا ڕایگەیاند: یەکێتیی نیشتمانیی کوردستان لە ئێستادا مۆدێلێکی نوێی کاری حزبی و حکومی پەیڕەو دەکات، بۆ ئەم مەبەستەش پێویستە تیمی حکومەتیش لە هەر ئاستێک دابن خۆیان لەگەڵ بەرنامە و کاری نوێی حزبدا بگونجێنن، بۆ جێبەجێکردنی ئەم دیدگا نوێیە.

د. یوسف ئاماژەی بەوەشکرد: مەڵبەندی دیراساتی گشتی ئامادەکاری دەکات بۆ کردنەوەی خولی پێگەیاندنی هەڤاڵانی تیمی حکومەت لە سەرجەم بوارەکاندا لەپێناو بەرزکردنەوەی زیاتری ئاستی بەڕێوەبردن و ئیدارە دانی پرۆژەکان.

د.یوسف گۆران لیێپرسراوی مەڵبەندی دیراساتی گشتی جەختی کردووە کە لەڕێگەی ئەم خولەوە هەڵسەنگاندن بۆ کادیرانی یەکێتی لە حکومەت دەکرێت و خاڵە بەهێز و لاوازەکان دیاری دەکرێن و کار بە ئەنجامەکەی دەکرێت.

لە کۆتایی کۆبوونەوەکەشدا، لێپرسراوی بۆردی حکومەت گرنگی ئەم خولەی بۆ هەڤاڵانی تیمی حکومەت ڕوون کردەوە و بەپێویستی زانی سوود لەم دەرفەتە وەربگرن و سوپاسی مەڵبەندی دیراساتی کرد بۆ ئەم جۆرە خولانە و بەڵێنی هاوکاری و هەماهەنگی تەواوی دووپاتکردووە، بڕیارە لە ئایندە یەکی نزیکدا خولەکە دەستپێبکات.

PUKMEDIA