465 مامۆستای ئاینی تاقیکردنەوەى ڕێبەری حاجیان ئەنجام دەدەن

راگەیاندنى حەج و عومرەی هەرێمی کوردستان

وێنەیەکى تاقیکردنەوەکەى مامۆستایان

ئەمڕۆ تاقیکردنەوەیەک بۆ 465 مامۆستای ئاینی بە مەبەستی دیاریکردنیان وەک ڕێبەری حاجیان (مورشید) بۆ وەرزی فەریزەی حەجی ساڵی 2027 ئەنجام درا.

کاروان ستونی وتەبێژی حەج و عومرەی هەرێمی کوردستان بە PUKMEDIA ڕاگەیاند: وەزارەتی ئەوقاف و کاروباری ئاینی پرۆسەی تاقیکردنەوەکەی بەشێوەی وزاری و لە یەک سەعاتى دیاریکراودا لە سەرانسەری هەرێمی کوردستان بەڕێوەبردووە.

‎بەپێی زانیارییەکانی وتەبێژی حەج و عومرە، ئامانج لەم تاقیکردنەوەیە دەستنیشانکردنی شایستەترین مامۆستایانى ئاینییە، تاوەکو بچنە ناو تیروپشکێکەوە بۆ هەڵبژاردنیان بۆ دوو فەریزەی حەج و ئاماژەی بەوەش کرد: هەر پرۆسەیەکی ساڵانەی حەج 31 ڕێبەر لەخۆدەگرێت.

کاروان ستونی وتەبێژی حەج و عومرەی هەرێمی کوردستان روونى کردەوە: پرۆسەی تاقیکردنەوەکە لە ڕێگەی سێ بنکەی سەرەکییەوە بەڕێوەچووە، کە ئەمانەن:

1.بنکەی هەولێر: تایبەت بە بەشداربووانی پارێزگای هەولێر و ئیدارەی سەربەخۆی سۆران.

2.بنکەی سلێمانی: بۆ مامۆستایانی سنووری پارێزگاکانی سلێمانی، هەڵەبجە و هەردوو ئیدارەی سەربەخۆی ڕاپەڕین و گەرمیان.

3.بنکەی دهۆک: بۆ مامۆستایانی پارێزگای دهۆک و ئیدارەی سەربەخۆی زاخۆ.

‎سەبارەت بە مەرجەکانی بەشداربوون، کاروان ستونی رایگەیاند: کە وەزارەتی ئەوقاف چەند پێوەرێکی سەرەکی بۆ 465 داواکارەکە دیاری کردووە، کە ئەمانەن:

1.بەشداربوو پێویستە پێشنوێژ و وتارخوێن، یان تەنیا پێشنوێژ یان تەنیا وتارخوێن بێت.
2. بەشداربوو لەسەر میلاکی رەسمی وەزارەتی ئەوقاف و کاروباری ئاینی بێت.
3. تەمەنی بەشداربوو لە نێوان 30 بۆ 60 ساڵدا بێت.

PUKMEDIA