بەتۆمەتی هەڕەشەو بڵاوكردنەوەی وێنەی تایبەت گەنجێك لەگەرمیان دەستگیركرا

راگەیاندنی پۆلیسی گەرمیان

پۆلیسی گەرمیان تۆمەتبارێكی دەستگیركرد

پۆلیسی گەرمیان تۆمەتبارێكی دەستگیر كرد، كە بە بەكارهێنانی 6 هەژماری ساختە لە تیكتۆك و سناپچات هەڕەشەی لەخەڵكی كردوەو داواش دەكات، هەركەس سكاڵای لەدژی هەیە سەردانی بەشی پۆلیسی نەهێشتنی تاوانی گەرمیان بكات و سكاڵا تۆمار بكات.

سۆران محەمەد غەریب، وتەبێژی پۆلیسی گەرمیان رایگەیاند:  لەدرێژەی ئەو هەڵمەتەی كە لەلایەن بەشی پۆلیسی نەهێشتنی تاوانی گەرمیانەوە گیراوەتەبەر بۆ دەستگیركردنی ئەو كەسانەی كە لە تۆڕەكۆمەڵاتییەكان دەبنە هەڕەشە بۆ سەر هاووڵاتیان، بەشی پۆلیسی نەهێشتنی تاوان توانیان تۆمەتبار ( ا - د ) تەمەن 21 ساڵ دانشتوی شاری كەلار بە تۆمەتی خراپ بەكارهێنانی ئامێرەكانی پەیوەندی بە هەڕەشەكردنی بڵاوكردنەوەی وێنەو ڤیدۆی ئافرەتان دەستگیر بكەن.

راشیگەیاند: پاش لێكۆڵینەوە لەگەڵی و پشكنینی مۆبایلەكانی دەركەوت كە تۆمەتباری ناوبراو شەش هەژماری لە تیكتۆك و سناپ چات بەكارهێناوە بەمەبەستی هەڕەشە كردن و بڵاو كردنەوەی ڤیدۆو وێنەی تایبەتی ئافرەتان و لە ئێستادا تۆمەتبار بەپێی ماددەی 2 لەیاسای خراپ بەكارهێنانی موبایل ڕاگیراوە پەڕاوی لێكۆڵینەوەی بۆ كراوەتەوەو لێكۆڵینەوە لەگەڵی بەردەوامە.

ئەوەشی خستەڕوو: تۆمەتبار بەو ئەكاونتانە هەڕەشەی لە خەڵكی كردوە كە لەسەر وێنەكە دانراوە هەركەس سكاڵای لەدژی هەیە سەردانی بەشی پۆلیسی نەهێشتنی تاوانی گەرمیان بكات و سكاڵا تۆمار بكات.

PUKMEDIA