قوباد تاڵەبانی بۆ کونسوڵی چین: هۆکاری گیانلەدەستدانی خوێندکارێکی هەڵەبجەیی روون بکرێتەوە

نوسینگەی راگەیاندنی قوباد تاڵەبانی

قوباد تاڵەبانی جێگری سەرۆکوەزیران و لیۆ جون کونسوڵی گشتیی چین

قوباد تاڵەبانی، جێگری سەرۆکوەزیران لە کۆبوونەوەیەکدا لەگەڵ لیۆ جون، کونسوڵی گشتیی چین لە هەرێمی کوردستان داوایکرد هۆکاری گیان لەدەستدانی خوێندکارێکی هەڵەبجەیی لە وڵاتی چین روون بکرێتەوە.

لە کۆبوونەوەکەدا کە سەرلەئێوارەی رۆژی چوارشەممە 9ی9ی2026 بەڕێوەچوو، جێگری سەرۆکوەزیران بە ئاماژەدان بە مردنی گوماناویی خوێندکارێکی هەڵەبجەیی لە هەرێمی شاندۆنگی چین داوایکرد حکومەتی چین هۆکاری گیان لەدەستدانەکەی ئاشکرا بکات و کارئاسانی بکات بۆ هێنانەوەی هەرچی زووتری تەرمەکەی بۆ کوردستان.

کونسوڵی گشتیی چین لەمبارەیەوە ئاماژەی بە هەوڵەکانی پۆلیسی وڵاتەکەی کرد بۆ روونکردنەوەی بابەتەکە و راشیگەیاند کارئاسانیی تەواو دەکەن بۆ هێنانەوەی تەرمی ئەو خوێندکارە کوردە بۆ هەرێمی کوردستان.

PUKMEDIA