Divê pirsgirêkên di navbera Herêm û Bexdayê de çareser bin

PUKMEDIA

Qubad Talebanî û Antonio Guterres

Cîgirê  Serokwezîr Qubad Talebanî bi Sekreterê Giştî yê Neteweyên Yekbûyî (NY) Antonio Guterres hevdîtin kirin  û li ser geşedanên dawî û guhertinên siyasî gotûbêj kirin.
Di civîna ku îro li Hewlêrê hat lidarxistin de Nûnera Taybet a Sekreterê Giştî yê Neteweyên Yekbûyî Jenine Plaschardt û Cîgirê Fermangeha Peyîwendiyên derve Daban Shadala amede bûn.
Di hevdîtinê de behsa pirsgirêkên navxweyî yên Herêma Kurdistanê û Êraqê hat kirin û tekez li ser çareserkirina wan pirsgirêkên bi rêya diyalogê hat kirin.
Di hevdîtinê de birêz Guterres behsa rol û girîngiya Serok Mam Celal kir û got:’’ Ez wek dostekî kevn ê Serok Mam Celal û hevalê we daxwaza çareserkirina pirsgirêkên navxweyî yên Herêma Kurdistanê ji bo parastina berjewendiyên hemwelatiyên Herêma Kurdistanê dikim’’.
Piştre rewşa Êraqê û pirsgirêkên di navbera Hewlêr û Bexdayê de gotûbêj kirin. Hat tekezkirin ku; Divê pirsgirêk li ser esasê têgihiştinê û li gorî berjewendiyên gelê Êraqê bên çareserkirin.
Qubad Talebanî pirsgirêkên siyasî yên Herêma Kurdistanê şîrove kir û nêrîna xwe derbarê çawaniya çareserkirina van pirsgirêkan anî ziman. Di dawiyê de jî spasiya serdana birêz Guterres kir û xebatên wî yên ji bo yekîtiya gelê Kurd û Êraqê bilind nirxand.
PUKMEDIA