Talebanî: Armanca me ew e ku kursiyên neteweyan nûnertiya wan a rastîn be

Ofîsa Qubad Talebanî

Talebanî li gel Balyozê Îtalya civiya

Cîgirê Serokwezîrê Herêma Kurdistanê Qubad Talebanî pêşwaziya Balyozê Îtalya li Êraqê Maurizio Griganti kir û di wê hevdîtinê de çend mijar ji wan pêwendiyên navbera Hewlêr û Bexdayê û hilbijartinên dahatû yên Parlamentoya Kurdistanê gotûbêj kirin.
Di civîna 8ê Adara 2023ê de li Hewlêrê, Qubad Talebanî piştgiriya  xwe ji bo hikûmeta Êraqê ya bi serokatiya birêz Sûdanî dûpat kir û hêvî xwest ku her du hikûmetên Hewlêr û Bexdayê di demeke nêzîk de li ser pirsa yasaya neft û gazê bigihin rêkeftinekê.
Her wiha got: Êraq welatekî girêdayî dahata petrolê ye, lewra heta Hewlêr û Bexda nekarin pirsa neft û gazê çareser bikin, pirsgirêkên din ên daliqandî  bi hêsanî çareser nabin.
Talebanî got:“Êdî dem hatiye ku dest ji wendakirina demê berdin û li ser danûstandinên rêkeftina li ser yasaya neft û gazê û çawaniya birêvebirin û firotina petrolê bisekinin, ji ber ku paşxistina rêkeftinê ne di berjewendiya gelê Êraq û Kurdistanê de ye.
Di mijareke dinê civînê de, guftûgo li ser pirsa hilbijartinên bê yên parlementoya Kurdistanê hate kirin, Qubad Talebanî got: “Amadene ji bo lidarxistina hilbijartinan û niha jî civînên lihevkirina li ser yasaya hilbijartinan destpê bûne,têgihîştinek baş heye û ya ku maye mijara kursiyên neteweyan e. Nêrîna me ji bo kursiyên wa diyar e û armanca me jî ew e ku kursiyên neteweyan ji bo nûnertiya rasteqîn a kêmîneyên Kurdistanê hebin."
PUKMEDIA