Serokomarê Êraqê hişyarî da Swêdê

Medya Serokatiya Komarê

Serokkomar Abdulletîf Reşîd

Serokomarê Êraqê “bi tundî” şewitandina Quranê û alaya Êraqê li Swêdê şermezar kir û wek “tevgereke bêberpirsiyarî” bi nav kir û dibêje ku ev bûyer dibin sedema aloziyên zêdetir.
Serokomariya Êraqê Pêncşemê 20ê Temûza 2023an ragihand, “Serokkomar Abdulletîf Reşîd bi tundî tevgerên bêberpirsiyarî yên hewldanên dubare yên binpêkirina Pirtûka Pîroz a Xwedê û alaya Êraqê şermezar kir û ew bi matmayî li rênegirtina rayedarên Swêdî dinêre. Li ser dewletekê pêwîst e ku rêzê li bawerî û tiştên pîroz bigire, ev yek dê pirsgirêkê zêdetir aloz bike û hest û hêrsê berfireh bike.”
Li gor daxuyaniya Serokomariyê Dr. Reşîd “Bi rêyên dîplomatîk daxwazê ji Swêdê dike ku rêzê li hestên Misilmanan bigire û pêşî li vê tevgera şaş bigire.”
Serokomariya Êraqê her wiha piştgiriyê dide mafê raderbirîna aştiyane ya ji bo protestokirina van kiryaran.
..
Her wiha Serokwezîrê Êraqê jî hişyarî da hikûmeta Swêdê û dibêje, eger careke din di bin navê azadiya ramanê de rê bê dayîn ku kopiyekî Quran a pîroz jî li ser axa wan bê şewitandin, em dê pêwendiyên xwe yên dîplomatîk li gel wî welatî qut bikin. Herwaha Sûdanî êrîşa li ser balyozxaneya Swêdê li Bexda şermezar kir û wek binpêkirina ewlehiyê pênase kir.
PUKMEDIA