Şalaw Elî Eskerî: Em hêvîdar in ku şehadeta Niyaz Dergelayî siyasî nebe

PUKMEDIA

Şalaw Elî Eskerî

Termê Niyaz Dergelayî bi amadebûna hejmareke zêde ji dost  û kesûkarên wî hat veşartin û Şalaw Elî Eskerî got: “Em hêvîdar in ev kuştin ne siyasî be û heta ku hêzên ewlehiyê bi xwe raporê negihînin em ti aliyekî tawanbar nakin”.
Kargerê Mekteba Siyasî ya Yekîtiya Niştimanî ya Kurdistanê (YNK) Şalaw Elî Eskerî di civîneke çapemeniyê de li ser gora endamê berê yê encûmena navendî ya YNKê Niyaz Dergelayî got; “Mixabin şehadeta rêheval Niyaz gelekî nezelal e û gelek şîroveyan li xwe digire. Em weke YNK’ê hêvî dikin ku ev kuştin ne siyasî be.’’
Her wiha got: ‘’Eger ev kuştin siyasî be, ji bo rewşa hestiyar a Kurdistanê ku niha pêwîstiya wê bi yekrêziyê heye, baş nabe û weke YNK heta ku asayîş negihe raporta xwe, ti aliyek tewanbar nake.’’
Şalaw Elî Eskerî  got:“Em li ser navê her kesî û li ser navê YNK’ê sersaxiyê ji malbata wî û hemû hevrêyên YNK’ê yên ku kurê xwe yê qehreman ji dest dane, dixwazin. Birêz Niyaz ne şervanê malbata xwe yê yekem e ku di têkoşîna gelê Kurd de canê xwe feda kiriye û ez hêvî dikim ku bibe yê dawî. Xwedê sebrê bide her kesî, kombûna vê girseya mezin a li vir nîşan dide ku çiqasî têkoşerê mezin bû.’’
PUKMEDIA