Pirsgirêkên Herêma Kurdistanê û Bexdayê dê bi rêkeftineke demdirêj çareser bibin

PUKMEDIA

Hevdîtinên birêz Qûbad Talebanî yên Dîplomatîk

Cîgirê Serokwezîr Qubad Talebanî pêşwaziya Balyozê Îtalya li Iraqê Maurizio Greganti kir û di wê hevdîtinê de çend mijar ji wan a  peywendiyên navbera Herêma Kurdistanê û Bexdayê û proseya çaksaziyê di Wezareta Pêşmerge de gotûbêj kirin.
Di civînê de ku roja 10.10.2023ê li Hewlêrê hat lidarxistin, têkeliyên navbera Herêma Kurdistanê û Bexdayê hatin gotûbêjkiri, Cîgirê serokwezîr got:‘’Her çendî karê me yê sereke cîbicîkirina yasaya bûdceyê û dabînkirina maf û mafên darayî yên hemwelatiyên Herêma Kurdistanê ye, lê ji bo çareserkirina hemû pirsgirêkên di navbera Herêm û Bexdayê de, pêwîst e rêkeftineke demdirêj û berfireh were kirin.
Derbarê pirsa petrolê de jî, Qubad Talebanî got:’’Niha hikûmeta federal di ber firotin û hinartina petrolê de berpirs e û Hikûmeta Herêma Kurdistanê jî di vî warî de ti berpirsyariyek nîne. Wî tekez kir ku; Ji bo çareserkirina pirsgirêka  petrol û gazê ya di navbera hikûmeta Herêma Kurdistanê û hikûmeta federal de, divê yasaya petrol û gazê li gorî destûrê û bi rêkeftinekê were pesendkirin û piştî pesendkirina yasayê dahata petrol û gaza tevahiya Iraqê bi awayekî wekhev were parve kirin.
Di beşeke din ya civînê de behsa proseya çaksaziyê li Wezareta Pêşmerge hat kirin. Di vê çarçoveyê de cîgirê serokwezîr amaje bi giringiya berdewamiya pirosesa çaksaziyê li nav hêzên Pêşmerge kir, ji ber ku daxwaza gelê Kurd û hevpeymanên me ye ku hêzeke niştimanî ya bihêz û Perwerde hebe.
PUKMEDIA