Serok Bafil: Em dixwazin bibin xwedî hêzeke neteweyî ya bihêz

PUKMEDIA

Serok Bafil û şandeke pilebilind a hevalbendan

Serokê Yekîtiya Niştimanî ya Kurdistanê (YNK) Bafil Celal Talebanî li Hewlêr  pêşwaziya şandeke pilebilind a hêzên hevpeymaniya navdewletî bi serokatiya Fermandeyê Giştî yê Hêzên Hevpeymanan li Îraq û Sûriyeyê General Joel Vowell re kir.
Di civînê de, Berpirsê Mekteba Peywendiyan Derbaz Kosret Resûl, Endamê Mekteba Siyasî Aso Mamend û Konsulê Giştî yê Amerîkayê li Herêma Kurdistanê Mark Straw amade bûn û pêşhatên dawî yên ewlehî û leşkerî û yekxistina hêzên Pêşmerge gotûbêj kirin.
Serok Bafil Celal Talebanî balkişand li ser serkeftina bizavên niştimanî ji bo parastina ewlehî û aramiyê û got: "Hewldanên me yên ji bo aramiya li welêt berdewam in û xebata me ji bo dûr xistina welat ji bêîstiqrariya li herêmê ye, ji bo vê yekê em bi hêz û aliyan re hevahengiyê dikin û naxwazin welatê me bibe qada çareseriya nakokiyan." 
Di derbarê birêxistinkirina hêzên Pêşmerge û serkeftina hewlan de jî Serok Bafil got:’’ Em li ser hewlên xwe yên ji bo bidestxistina vê armanca bilind berdewam in û em dixwazin li ser bingeha hevsengî û wekheviyê hêzeke niştimanî ya bihêz ava bikin û  her îradeyekî ji derveyî vê mebestê red dikin û naxwazin berjewendiyên hizbî bi vê meseleya netewî re têkel bibin.’’
Di bersivê de Joel Vowell spasiya Serok Bafel Celal Talebanî kir ji bo alîkarî û hevahengiya wî ji bo destpêkirina kar û çalakiyên Wezareta Pêşmerge û çareserkirina pirsgirêkên wezaretê.
PUKMEDIA