Herêm û Bexda nêzîkî çareserkirina mijara mûçeyê ne

Kurdistan 05:43 PM - 2024-01-25

Budçe

Hikûmeta Herêma Kurdistanê piştî hatina pereyên hikûmeta federal wê dest bi dabeşkirina mûçeyan bike û peyvdarê cîgirê serokwezîrê Herêmê jî dupat dike ku gotûbêjên di navbera Herêm û Bexdayê de derbarê guhertina yasaya bûdceyê ber bi çareseriyê ve diçin.

Berdevkê Cîgirê Serokwezîrê Herêma Kurdistanê Semîr Hewramî di daxuyaniyeke taybet de ji malpera fermî ya Yekîtiya Niştimanî ya Kurdistanê PUKMEDIA re ragihand: Gotûbêjên Herêm û Bexdayê li ser sererastkirina yasaya bûdceya federalî gihiştine encamên erênî û ber bi çareseriyê ve diçin û tenê çend mijarên hûrbîn mane û hêvî heye ku deng li ser sererastkirina guhertinê Yasa di civîna bê ya kabîneyê de were dayîn.

Semîr Hewramî derbarê pirsa dubare hinartina petrola Herêma Kurdistanê de jî got: Cudahiya di navbera Herêm û Bexdayê li ser mijara petrolê li ser nirxê berhemanîn û hinardekirina petrolê ye, derbarê nirxê berhemanînê petrolê de jî çareseriyek hatiye dîtin tenê pirsgirêka hinardekirinê maye, ji ber ku mijar pêşkêşî Serokwezîrê Federalî Mihemed Şeya El-Sudanî hatiye kirin ku biryarê li ser bide.
Hewramî got jî: Eger hikûmeta federal bixwaze hinartina petrolê ji nû ve dest pê bike, dibe ku di demeke nêz de bi rêya kampaniya Bazirganî ya Nefta Êraqê (SOMO) hinardekirina ji herêmê bo bendera Cîhanê ya Tirkiyeyê ji nû ve dest pê bike.

Pirsgirêka mûçeyan dê bi yekcarî çareser bibe

Semîr Hewramî derbarê dosyaya mûçeyê fermanberên herêmê de jî amaje bi wê yekê kir ku eger Encûmena Wezîran a Federalî li gorî rêkeftina bûdceyê sererastkirina yasaya bûdceyê pesend bike, dê pirsgirêka paşxistina mûçe bi yekcarî were çareserkirin. Herwiha tekez kir ku ji bo vê mehê hikûmeta Herêmê dê dest bi dabeşkirina mûçeyan bike dema ku Bexdad bişîne ku 618.5 milyar dînar e.
Encûmena Wezîrên Êraqê di civîna xwe ya roja 14.01.2024ê de biryar da ku her meh zêdetirî 618 milyar dînar ji bo dabeşkirina mûçeyan ji hikûmeta Herêma Kurdistanê re were şandin, heta ku qanûna bûdceyê li parlamentoya Êraqê were sererastkirin, di çarçoveya pişka herêmê de ya budceya federal, ku ji sedî 12,67ê lêçûnên giştî ye.


PUKMEDIA