Talebanî: Biryarê li ser lidarxistina hilbijartinan didin

Ofîsa Çapemeniyê ya Qubad Talebanî

Talebanî bi Balyozxaneya Amerîkayê re civiya

Cîgirê Serokwezîr Qubad Talebanî pêşwaziya Berpirsê Karûbarên Balyozxaneya Amerîka li Iraqê David Berger kir û rewşa ewlekariya Iraq, Kurdistan û navçeyê gotûbêj kirin.

Di civînê de ku roja 14-2-2024 li bajarê Hewlêrê bi amadebûna Mark Straw Konsulê Giştî yê Amerîkayê li Herêma Kurdistanê hat lidarxistin, tekezî li ser berdewamiya aramiya Iraq û Herêma Kurdistanê hate kirin. Her du alî li ser wê yekê hevdeng bûn ku divê hemû alî hestyariya rewşê li ber çavan bigrin, ji ber ku her alozî û helwesteke şaş dikare aramiya Iraq, Kurdistan û navçeyê bixe metirsiyê.

Cîgirê serokwezîr got: ‘’Metirsiya terorîstan li Iraq û Kurdistanê berdewame û DAIŞ û grûpên terorîstî li derfetekê digerin bo rêkxistin û têkdana asayîşa navçeyê, lewra pêwîstiya me bi amadekariyên zêdetir heye bo jinavbirina terorê.’’

Mijareke din a hevdîtinê jî hilbijartinên dahatî yên parlamentoya Kurdistanê bû. Qubad Talebanî tekez kir, ku divê di demeke herî nêzîk de biryara hilbijartinan were dayîn û di demeke nêzîk de hilbijartin bi awayekî paqij, dadmend û şefaf were kirin.
PUKMEDIA