Talebanî ji Amerîkayê re: Paşxistina hilbijartinan zirarê dide Kurdistanê

Buroya Çapemeniyê ya Qubad Talebanî

Qubad Talebanî û Senator Ted Budd

Cîgirê Serokwezîr Qubad Talebanî pêşwaziya şandeke Senatoya Amerîkayê kir ku ji Senator Ted Budd, Senator Johnny Ernst û şandeke pê re pêk dihat. Têkiliyên navbera Herêma Kurdistanê û Amerîkayê, hilbijartinên parlamentoya Kurdistanê û çendîn mijarên din gotûbêj kirin.

Civîna roja şemiyê (04.05.2024) û bi amadebûna Balyozê Amerîkayê li Iraqê û Konsulê Giştî yê Amerîkayê li Herêma Kurdistanê hat lidarxistin. Şanda Senatoyê tekezî li ser piştegiriya  Amerîka bo Herêma Kurdistanê kir û ragihand ku serdana wan nîşana pabendbûna Amerîka ye ku giringiyê bi pêwendiyên xwe yên ligel Herêma Kurdistanê dide.

Cîgirê Serokwezîr spasiya piştgiriya  û alîkariyên Amerîka bo Herêma Kurdistanê kir, bi taybetî di şerê dijî terorîstan û proseya çaksaziyê di hêzên Pêşmerge de.

Di hevdîtinê de rewşa ewlekariya Kurdistan, Iraq û navçeyê hate gotûbêjkirin. Her du alî li ser wê yekê hevdeng bûn ku hemahengiya di navbera hêzên Pêşmerge, hêzên Iraqî û hêzên hevpeyman bo rûbirûbûna metirsiya terorîstan giring û pêwîst e, ji ber ku hê jî teror gefeke cidî ye li ser asayîşa Iraq, Herêma Kurdistanê û navçeyê.

Di beşeke din ya hevdîtinê de rewşa navxwe ya Herêma Kurdistanê û pirsa hilbijartinên parlamentoya Kurdistanê hatin gotûbêjkirin. Qubad Talebanî helwesta xwe û YNKê ji şanda mêvan re rave kir û got:’’ Em her hewlek ji bo paşxistina hilbijartinan red dikin, ji ber ku paşxistina zêdetir a hilbijartinan dê ziyaneke mezin bigihîne rewatiya saziyên herêmê û dê proseya demokrasiyê li herêmê jî bikeve metirsiyê.’’

Derbarê peywendiyên navbera Herêma Kurdistanê û Bexdayê de jî Cîgirê Serokwezîr got ku di mijara bûdce û mûçeyên Herêma Kurdistanê de pêşketin hene. Wî got: ‘’Ew ê hemû hewlên xwe bidin ji bo ku vê û pirsgirêkên din ên li ber çavan bi awayekî bingehîn çareser bikin.’’

PUKMEDIA