Talebanî: Divê hilbijartin di dema xwe de bên kirin

Nivîsgeha Ragihandinê ya cîgirê Serokwezîr

Cîgirê Serokwezîr û Balyozê Yekîtiya Ewropayê

Cîgirê Serokwezîr Qubad Talebanî pêşwaziya Balyozê Yekîtiya Ewropayê li Iraqê Thomas Siller kir û çend mijarên berjewendiya hevbeş gotûbêj kirin.

Di civînê de ku roja sêşemê (23.07.2024) li bajarê Hewlêrê hat lidarxistin, behsa çawaniya pêşxistina şarezayên ciwanên afirandêr û karsaz li Herêma Kurdistanê hate kirin. Di vê derbarê de Cîgirê Serokwezîr nêrîn û planên xwe yên bihêzkirina ciwanan eşkere kir û behsa projeya Weqfa Hub kir ku biryar e di demeke nêz de were vekirin.

Di vê çarçoveyê de, Qubad Talebanî daxwaz ji Yekêtiya Ewropayê kir ku alîkariyên zêdetir ji Herêma Kurdistanê re terxan bike ji bo bihêzkirina xortan ji bo dahênerî û karnasiyê, ji ber ku bi rêya vê pirojeyê dê derfetên kar ji bo ciwanan çêbibe û dê bibe alîkar bo geşepêdana karsaziyên biçûk.

"Serkeftina projeya Weqfa Hub û pêşxistina karsaziyên piçûk jî di berjewendiya Yekîtiya Ewropî de ye ji ber ku dê bandorek li ser kêmkirina rêjeya koçberiya neqanûnî ya ciwanan li derve hebe," wî got.

Di beşeke din ya civînê de pirsa hilbijartinên bê ya Parlementoya Kurdistanê hate gotûbêjkirin û di vê derbarê de, Qubad Talebanî balkişand li ser girîngiya lidarxistina hilbijartinan ji bo parastina rewatiya saziyên hikûmraniyê.

Her wiha tekezî li ser wê yekê kir ku pêwîste hilbijartin di roja ku ji aliyê Serokatiya Herêma Kurdistanê ve hatiye diyarkirin de pêk were.

PUKMEDIA