Talebanî û Balyozê Brîtanya: Divê penaber bê tirs vegerin warê xwe

Daxuyaniya Qubad Talebanî

Cîgirê Serokwezîr û Balyozê Brîtanya

Cîgirê Serokwezîr Qubad Talebanî pêşwaziya Balyozê Brîtanya li Iraqê Stephen Hitchen kir û di wê hevdîtinê de pirsa Şengalê, rewşa emnî ya Iraq û Herêma Kurdistanê û çendîn mijarên din ên balkêş gotûbêj kirin.

Civîna îro roja duşemê (05.08.2024) li bajarê Hewlêrê hat lidarxistin û Cîgirê Berpirsê Fermangeha Pêwendiyên Derve ya Hikûmeta Herêma Kurdistanê Daban Şadala jî amade bû, behsa rewşa Şengalê hat kirin û her du alî tekez li ser wê yekê kirin ku pêwîste bilez avadankirin û aramkirina deverê were kirin daku koçber bê tirs û xof vegerin warên xwe.

Di vê derbarê de cîgirê serokwezîr balkişand li ser wê yekê ku pêwîste xelkê deverê di asayîkirin û avadankirina navçeyên xwe de beşdar bin û pêwîstî bi giheştina rêkeftineke berfireh bo parastina aramiyê û dabînkirina vegera penaberan pêwîst dît.

Eşkere kir ku ewê hemû hewlên xwe bidin ji bo çareserkirina pirsa Şingalê bi awayekî ku di berjewendiya gelê herêmê de be.

Li beşekî dinê vê hevdîtinê de, her du alî behsa pêşhatên dawî yên siyasî û ewlekarî yên li deverê de kirin û her du alî li ser wê yekê hemfikir bûn ku her du aliyên hikûmeta Federal û Hikûmeta Herêma Kurdistanê û hemû aliyên Iraqî hestiyartir tevbigerin û ji bo parastina asayîş û aramiyê bi hev re kar bikin. 

PUKMEDIA