Serok Bafil: YNK rê nade cudabûn û dîktatoriyê di rêveberiyê de

PUKMEDIA

Civînên Serokê YNKê li Hewlêrê

Serokê Yekîtiya Niştimanî ya Kurdistanê (YNK) Bafil Celal Talebanî li baregeha Mekteba Siyasî ya Hewlêrê bi serokên navçeyên hilbijartinan ên parêzgeha Hewlêrê re civiya.

Di civînê de ku bi amadebûna rêheval Refat Ebdullah, Derbaz Kosret Resûl, Aso Mamend û Rêwaz Fayeq, endamên Mekteba Siyasî û Saadî Ehmed Pîra berdevkê YNKê, Serok Bafel Celal Talebanî spasiya hewldanên bêwestan ên Hewlêriyan  yên ji bo guhertinê û serastkirina rêya şaş a desthilatdariyê kir. Got jî: YNK wek her carê dê li gel Hewlêrên berxwedêr bimîne û vê carê jî bi hev re ji Hewlêra paytext mizgîniya avakirina hikûmeteke ku xizmeta welatiyan bike û bi can û çarenivîsa wan nelîze.’’

Derbarê lidarxistina hilbijartinan û guhertinên desthilatê de jî Serok Bafil got ku YNK bi ti navekî rê nade cudahî û dîktatorî di desthilatê de hebe û di warê mûçe û debara xelkê de pirsgirêk  hebe.Ya ku divê biqewime avakirina qonaxeke nû ya desthilatdariyê ye ku bersiva daxwazên welatiyan bide û bikare pirsgirêkên mûçe û debara xelkê çareser bike û jiyana xelkê xwe neke qurbaniya nakokiyên siyasî û nedadperwerane.Lewma ev hilbijartin derfeteke girîng û diyarkere ku em hemû bi ruhekî niştimanî û berpirsane ber bi pêşerojeke aramtir ve biçin û pêşerojeke geştir ji bo nifşên xwe ava bikin.

Di dawiya hevdîtinê de jî Serokê YNK'ê xîtabî Hewlêriyên serbilind kir û got, bi piştgiriya Xwedê û gelê xwe yê dilsoz, me di dema borî de gavên mezin û bi bandor avêtine, ez bawer im di pêşerojê de jî bi ruhê yekîtî û kurdewarî yê bê westan emê serkeftinên mezin bi dest bixin.Hewlêr axa pîroz a Kurdistanê ye û ya hemû kesên ku bi dil û can ji Kurdistanê hez dikin, ne yên ku ji bo berjewendiyên teng ên hizbî û şexsî bikar tînin.

PUKMEDIA