Qubad Talebanî: Ji bo pêşxistina sektora perwerdeyê gelek projeyên me hene

Ajans

Qubad Talebanî û rêkxera Next Step

Îro yekşemê pêşangeha “nesxt step” di duyemîn rûniştina xwe de li bajarê Silêmaniyê bi beşdariya gelek zanîngeh, peymangehên hikûmî û taybet û kompaniyên bazirganî hate lidarxistin.

Di merasîma vekirina pêşangehê de Cîgirê Serokê Hikûmeta Herêma Kurdistanê Qubad Talebanî û hejmareke din ji berpirsên hikûmetê û hejmareke zêde ya xwendekar û mêvanan amade bûn.

Di çarçoveya çalakiyên pêşangehê de, Cîgirê Serokê Hikûmeta Herêma Kurdistanê Qubad Talebanî di semînarekê de ku ji aliyê PUKMEDIA ve hat şpandin de got: Ev pêşangeh ji bo pêşxistina sektora xwendinê û asta xwendekaran û dabînkirina paşerojeke baştir ji bo wan gelek girînge, herweha ji bo peydakirina derfetên kar ji bo xwendekarên derçûyî.

Got jî: Zêdekirina zanîngeh, peymangeh û xwendingehan li herêma Kurdistanê alîkariya geşepêdana xwendinê dike û em kar li ser pêşxistina vê sektorê li hikûmeta herêma Kurdistanê dikin û di vî warî da gelek projeyên me yên giring hene.

Talebanî wiha dewam kir: Ez bi xwe bawerim bi afirînerîyê, ku me ji qonaxekê ber bi qonaxeke pêşketîtir ve dibe û bi pêwîstiya peydakirina cih û derfetan bo xortên afirîner ku xwe îsbat bikin û xwe nîşan bidin. ev mijar pêwîstî bi piştevaniya dualî ya hikûmetê û sektorên taybet heye.
Got jî: Ciwan ew in ku çerxa pêşketinê ber bi pêş ve dibirin, û divê derfet û hêviyek mezin bidin xortan ku di xizmeta welatê xwe de kar bikin û asta rêvebirinê pêş bixin û ew in ku dê di paşerojê de welat bi rê ve bibin.

PUKMEDIA