Talebanî: Divê Ewropa û rêxistinên navdewletî çavdêriya hilbijartinan bikin

Daxuyaniya Qubad Talebanî

Qubad Talebanî û Dîplomatên Ewrûpa

Cîgirê Serokwezîr Qubad Talebanî bi awayekî cuda li gel Balyoza nû ya Hollandayê li Iraqê Janet Alberta, Berpirsê Nû yê Ofîsa Yekîtiya Ewropayê li Herêma Kurdistanê Rado Bottom û Parlamenterên Norwêcê Azmond Aukrust û Hanî Huseynî civiya.

Di her sê civînên ku roja duşemê (23.09.2024) li Hewlêrê hatin lidarxistin de behsa amadekariyên hilbijartinên Parlamentoya Kurdistanê û diyardeya koçkirina ciwanan bo welatên Ewropayê hat kirin.
Di derbarê koçkirina neyasayî ya ciwanan bo Ewropayê, cîgirê serokwezîr tekez li ser wê yekê kir ku baştirîn çareserî ji bo rêgirtina li koçberiya neyasayî ya ciwanan, baştirkirina rewşa ciwanan li Herêma Kurdistanê ye. Welatên Yekîtiya Ewropî dikarin baştir pêşî li koçberiya neqanûnî ya ciwanan bigrin bi pêşvebirina sermayeguzariyê li herêmê, peydakirina derfetên kar ji bo ciwanan û projeyên perwerdekirina ciwanan di warên cuda de, nemaze di warên karsazî û nûjeniyê de.

Di beşeke din ya civînan de, Qubad Talebanî tekez li ser lidarxistina hilbijartinên pak û adil li Herêma Kurdistanê kir ku îradeya gelê Kurd nîşan bide û ji bo vê yekê jî daxwaz ji rêxistinên navdewletî û welatên Yekîtiya Ewropayê kir ku bi hûrî çavdêriya proseya hilbijartinan bikin.

PUKMEDIA