Piştî rûxana Beşar Esed

Kurdistan 01:27 PM - 2024-12-18

Alaya Tehrîr EL-Şam

 Siyasetmedar û şirovekarên siyasî yên Kurd li Rojavayê Kurdistanê daxwaza yekrêziya mala Kurdî dikin daku mafên xwe li Rojavayê Kurdistanê bidest bixin, herwiha ji bo çareserkirina pirsgirêkên navxweyî yên Sûriyê û Rojavayê Kurdistanê ji her cure diyalogê re amade ne û tekez jî dikin ku Sûriyeya niha pêdiviya xwe bi karîzmayeke weke Serok Mam Celal Talebanî heye, da ku aliyên siyasî û pêkhateyan li ser heman maseyê bicivîne û bigihêje rêkeftinekê û çareseriyê.

Hevpeyvîn bi Îbrahîm Qamîşloyî re

Li hemberî kurdan bêdeng in
Dr.Ehmed Berekat Sekreterê Partiya Pêşverû ya Kurd li Sûriyê ji Kurdistan New re got: Yên ku niha li Sûriyê desthilatdar in, piştî rûxandina rêjîma Beşar Esed, li hember Kurdan bêdeng in û ti tiştekî neyînî li hember Kurdan negotine. Di vê qonaxê de derbarê niyeta wan a li hember mafên gelê Kurd de agahiyên kêm di destê me de ne.

Amaje bi wê yekê jî kir ku diyaloga Kurdî û Kurdî li Rojavayê Kurdistanê li ser mafên Kurdan ti encam nedaye û nekokî berdewamin û her diçe zêdetir dibin, lewma divê hemû aliyên Kurdistanî yên Rojavayê Kurdistanê rewşa awarte ya xelkê Rojavayê Kurdistanê û penaberan berçav bigrin. 

 

Sekreterê Partiya Pêşverû ya Kurd D.Ehmed Berekat:
Partiyên siyasî yên Kurd li Sûriyê divê nekokiyên xwe bidin aliyekî û bi yek ref serdana Şamê bikin ji bo bihêzkirina mafên Kurdan

Naxwazin Kurd bibin yek
Sekreterê Partiya Pêşverû ya Kurd li Sûriyê tekez kir ku: Pêwîste aliyên siyasî yên Kurd li Sûriyê nekokiyên xwe bidin aliyekî û bihevre serdana Şamê bikin bo misogerkirina mafên neteweya Kurd di Sûriya nû de, lê mixabin di nav tevgera siyasî ya kurdî de hin alî hene ku naxwazin kurd di nav xwe de yekgirtî bin û xwe ji mafên miletê xwe li Sûriyê berpirsiyar nabînin.
Wî jî got:Nabe ti hêzeke Kurdî cuda serdana Şamê neke, divê şandeke ku nûnertiya hemû partî û civakên Bakur û Rojhilatê Sûriyê dike, bi yek projeyekê serdana Şamê bike û em ê bi vî awayî bi serkeftî bin. lê mixabin tu hêviyek ji avakirina şandeke yekgirtî ya Kurdistanî nemaye.

Di Sûriyeya nû de roleke sereke hebê
 Dr. Ehmed Berekat li ser rola Kurdan di Sûriyeya nû de got: Ji ber ku Kurd di dirêjahiya dîrokê de li Sûriyê civakeke sereke û blindest bû û neteweyeke ku li ser mafên xwe israr dike.pêwîsta rola wê di sûryeya nûh de hebê, Heger ev sêzdeh sal in gelê Sûriyê bindest bûye, wê demê em Kurd bûne bindest û ev sed sal in ku mafên me hatine paşguhkirin, nemaze piştî damezrandina Komara Erebî ya Sûriyê.

Ji bo Kurdan qonaxeke dîrokî
Îro qonaxeke dîrokî ye ji bo Kurdan û derfetek ji bo bihêzkirina mafên vî gelî di Sûriyeya nû de, helbet ev yek wê bi hewldan û yekrêziya Kurdan pêk were.
Derbarê Desteya Tehrîr Şam de D. Ehmed Bereket dibêje: Em bi rêkûpêk Tehrîr El-Şam nas nakin. Berê pêwendiya me bi opozisyona Sûriyê re hebû û me nêrîna hev zanî, lê ezmûna me li Helebê bi Desteya T.Ş re heye, ji bo parastina her du taxên kurdan Şêx Meqsûd û Eşrefiyê, û helwesteke wan ya baş li hember kurdên Helebê heye.

Pêdiviya Sûriyê bi karîzmayeke weke Mam Celal heye
Sekreterê Partiya Pêşverû ya Kurd li Sûriyê tekez kir ku Sûriyeya niha pêwîstî bi karîzmayeke weke Rewanşad, Serok Mam Celal Talebanî heye ku hemû hêz û pêkhateyên siyasî li ser yek maseyê bicivîne.

PUKMEDIA/ Kurdistanî Nûh