Ji destpêka îsal ve Tirkiyê 404 êrîş bo ser herêmê pêk anîne

PUKMEDIA

Êrşên Tirkiyê li Herêma Kurdistanê

CPT ya Hikûmeta Herêma Kurdistanê ragihand ku artêşa Tirk di sê mehên destpêkê yên sala 2025’an de 404 êrîş û topbaran li ser Herêma Kurdistanê pêk anîne û di encamê de 2 welatiyên sivîl jiyana xwe ji dest dane, 4 kesên din jî birîndar bûne û 5 şikeftên xwezayî jî hatine hilweşandin.

Di raporta tîma CPT ya derbarê van êrîşan de di meha adara borî de hat gotin: Piştî ku Partiya Karkerên Kurdistanê agirbesta yekalî ragihand, tenê di meha Adarê de artêşa Tirkiyê 118 êrîş pêk anîne.

Li gorî vê raporê, di yekemîn heftiya piştî ragihandina banga aştiyê ji aliyê Rêberê girtî yê Partiya Karkerên Kurdistanê (PKK) Abdullah Ocalan ve, li gorî du hefteyên beriya ragihandina agirbestê, rêjeya bombebarana Tirkiyê %145 zêde bûye. Di raporê de her wiha hat destnîşankirin ku êrîşên Tirkiyeyê yên di meha Adarê de li gorî meha Çile ji sedî 12, li gorî meha Sibatê jî ji sedî 21 kêm bûne.

Di raporê de hatiye ku artêşa Tirkiyê di meha Adarê de 55 êriş li ser sînorên parêzgeha Hewlêrê, 51 êriş li ser sînorên parêzgeha Duhokê û 12 êriş jî li ser navçeyên sînorî yên parêzgeha Silêmaniyê kirine.

Tîma CPT ya Hikûmeta Herêma Kurdistanê jî di rapora xwe de eşkere kir ku êrîşên Tirkiyê yên li ser sînorên îdarî yên parêzgeha Hewlêrê di meha Adarê de li gorî meha Sibatê ji sedî 120 zêde bûne.  Artêşa Tirk meha borî bi TNT 5 şikeftên xwezayî teqandin.

Di raporê de hatiye ku artêşa Tirkiyê di çaryeka yekem a sala 2025an de nêzîkî 404 êrîş û êrîşên esmanî li ser Herêma Kurdistanê pêk anîne û di encamê de 2 welatiyên sivîl jiyana xwe ji dest dane û 4 kesên din jî birîndar bûne.

PUKMEDIA