Qubad Talebanî: Em ê Silêmaniyê bikin navenda nûjenî û karsaziyê

PUKMEDIA

Qubad Talebanî

Îro yekşemê li Navenda Kultur a bajarê Silêmaniyê, bi amadebûna Qubad Talebanî Cîgirê Serok Wezîrê Herêma Kurdistanê, karê kopiya duyemîn ê Konferansa Navdewletî ya Nûjenî û Karsaziyê dest pê kir.

Cîgirê Serok Wezîrê Herêma Kurdistanê Qubad Talebanî gotarek pêşkêş kir ku PUKMEDIA ew dişopand de tê de bixêrhatina amadebûyan kir û tekezî li ser giringiya vê konferansê ji bo piştevaniya karsazî û aboriya Herêma Kurdistanê kir.

Got jî: Em dixwazin Silêmanî bikin paytexta nûjenî û karsazîyê, her karekî mezin bi pêngavekê dest pê dike û em kar bo pêşxistina afrandinê û dahênerî û kargêrî li herêma Kurdistanê dikin.
Cîgirê Serokwezîrê Herêma Kurdistanê diyar kir: Ev konferans dê bandoreke mezin li ser guhertin û pêşxistina asta kar bike. Nêrîneke me ya berçav heye, ew e ku Herêma Kurdistanê bibe navendeke girîng a nûjenî û karnasî û pêwîstiya me bi tiştekî ji ciwan, karsaz û siyasetmedarên Herêma Kurdistanê heye, ew jî bawerî û xwebawerî ye. Baweriya min bi şiyana ciwanan heye, lewma divê ew jî bi xwe bawer bin û li ser afirînerî û nûjeniyê bixebitin.

Wî got: Nûjenî livkereke sereke yê aboriya me û bazara karî ye îro û sibê jî. Gelek welatên cîhanî ji bo pêşxistina nûjenî û karsaziyê dixebitin. Çima em nikarin wê yekê bikin? Çima pêşketin tenê li welatên pêşketî çêdibe? Ma ezmûna me tune? Ma mêjiyên me yên afrînar nînin? Ma zanîngehên me yên pêşketî nînin? Her tiştê me heye û em dikarin Silêmanî û Kurdistanê bikin navendeke girîng a nûjenî û karsaziyê. Ev dîsa vedigere xwebaweriyê û ger em bi xwe bawer bin, em ê karibin vê armanca mezin pêk bînin.

Qubad Talebanî diyar kir: Nûjenî tenê ne taybete bi kampaniya, belê ji bo ku sibe ji duh çêtir bikin di jiyana xwe ya rojane de jî pêdivî bi nûbûnê heye. Em ji bo pêşxistina afrînarî û karsaziyê dixebitin. Herêma Kurdistanê ji bilî êrîşên rêxistina terorîst a DAIŞê û pêşwazîkirina hejmareke zêde ya awareyan, rastî kêşeyên mezin ên aborî hat. Em rastî pirsgirêkên mezin hatin me nekarî mûçeyan dabeş bikin û ti agahî derbarê kesên mûçe werdigirin jî tunebûn. Spas  ji Xwedê re me dest bi cîbicîkirina projeya tomarkirina biyometrîk kir û di demeke kin de me karî hemû karmendan tomar bikin û îro em encam vê pirojeyê distînin, ku karekî mezin li yekxistina mûçeyan kiriye. Ev nûbûneke baş û girîng bû, û emê bi îzna Xwedê di paşerojê de ji bo nûjenkirina projeyên din ên girîng kar bikin.

Cîgirê serokwezîr diyar kir: Emê berdewam bin li ser kar bo serrastkirina rêbaza hukimdariyê li Herêma Kurdistanê û veguhertina hikûmetê bo elektronî. Gelê me yê hişyare, çavkaniyên xwezayî yên pir mezin, dîrokek tijî serbilindî û ruhê nûjeniyê heye. Li hember me zehmetiyên mezin hene divê em rûbirûyê wan bibin, û armanca konferansê jî ev e ku bîr û ramanên nû û hemû kesên dilsoz û niştimanperwer li hev kom bike, ji bo yekkirina raman û pêşniyaran, xwendina pirsgirêkan û çareserkirina wan bi awayekî komî û pêkanîna guhertinên rasteqîne. Em ê her gav piştgiriyê bidin nûjeniyê, lê daxwazek me ji nûkeran heye, ew e ku ber bi nûbûnek çêker ve biçin ku beşdarî avakirina welat û pêşxistina şiyanên wî dibe. 

 
PUKMEDIA