Talebanî û Nikos Dendias: Divê hevkariyên ewlehiyê bên zêdekirin

Buroya Çapemeniyê ya Qubad Talebanî

Qubad Talebanî û Nikos Dendias

Cîgirê Serokwezîr Qubad Talebanî di çarçoveya Korbenda Navdewletî ya Delphi de ligel Wezîrê Berevaniya Yûnanistanê Nikos Dendias civiya û rewşa ewlekarî û aramiya navçeyê gotûbêj kirin.

Civîna roja înê (11.4.2025) bi amadebûna Dara Reşîd wezîrê pilandananê û Daban Şedala cîgirê berpirsê fermangeha têkeliyên derve hate encamdan û rewşa ewlehî û aramiya navçê û çawaniya rûbirûbûna terorîstan hate gotûbêj kirin.

Di derbarê peywendiyên di navbera Herêma Kurdistanê û Yûnanistanê de jî tekez li ser bihêzkirina hemahengî û hevkariya di navbera saziyên emnî û leşkerî yên her du aliyan de bi taybetî di warê şerê dijî terorê de hat kirin.

Di mijareke din de behsa rewşa siyasî ya Herêma Kurdistanê û hewlên pêkanîna kabîneya nû hat kirin. Di vê derbarê de Cîgirê Serokwezîr eşkere kir ku pêngavên gelek baş hatine avêtin û li gor têgihiştina heyî, giftûgo di navbera YNK û PDKê de berdewam dibe û em geşbîn in ku di herî nêzîk de her du alî bigihin rêkeftina dawî.

PUKMEDIA