Berdevkê Sûdanî: Em ê li dijî her aliyekî ku aştiya li Iraqê têk dide rawestin

Arşîv

Sebah Nuhman, berdevkê fermandarê giştî yê hêzên çekdar ên Iraqê

Berdevkê fermandarê giştî yê hêzên çekdar tohmetên hêzên Iraqî yên têkdana aramiya welêt red kir û ragihand:Em ê dudilî nebin ku li dijî her aliyekî ku hewl dide ewlehiyê li seranserê Iraqê bêîstîqrar bike an jî têk bide, tedbîrên yasayî yên tund bigirin.’’

Hikûmeta Iraqê li hember êrîşên li ser Hikûmeta Herêma Kurdistanê (KRG) li Hewlêrê bersiv da û got:’’Tawanbarkirina saziyeke ewlehiyê ya fermî ya Iraqê bi tu hincetî nayê qebûlkirin û em wê şermezar dikin.’’

Sebah Nuhman, berdevkê fermandarê giştî yê hêzên çekdar ên Iraqê, got:"Wezareta Navxweyî delîl pêşkêş nekiriye ku saziyeke fermî ya Iraqê bi êrîşa li ser Hewlêrê tawanbar bike û tohmeta Haşdî Şabî red dike û nayê qebûlkirin.’’

"Hikûmeta federal û dezgehên wê yên ewlehiyê gelek caran dubare kirine ku ew ê li dijî her kesê ku dixwaze ewlehî û îstîqrarê li hemû deverên Iraqê têk bide, tedbîrên yasayî yên tund digirin." wî got.

Wî rave kir:"Pirsgirêkên heyî hewceyê hevkariyê û hevrêziyê bi rêya saziyên fermî ne, li şûna ku serî li medyayê bidin û rapor û daxuyaniyên ku saziyên Iraqî yên ku welat û ewlehiya wê diparêzin qirêj bikin.

"Daxuyaniyên wiha hincetek didin opozîsyonê ku zirarê bidin aramiya Iraqê," got Sebah Nuhman, berdevkê fermandarê giştî yê hêzên çekdar ên Iraqê.

Hikumeta Herêma Kurdistanê (KRG) duh êvarê ragihand:"Êrîşên bi dronan ji hêla hin komên girêdayî Heşdî Şebî ve bi mebesta çêkirina kaosê têne kirin û divê aliyên peywendîdar ên di hikûmeta federal de sînorek ji van kiryarên wêranker re deynin û tedbîrên qanûnî bigirin. Li dijî sûcdaran tedbîran bigirin."

PUKMEDIA