Dixebitin ku ji nû ve îxracata petrolê bidin destpêkirin

Kurdistan 01:23 PM - 2025-08-06

Civîna rojnamevanî ya Heyan Ebdulxenî û parêzgarê Kerkûkê

Cîgirê Serokwezîrê Îraqê yê ji bo Karûbarên Enerjiyê û Wezîrê Petrolê Heyan Ebdulxenî di serdana xwe ya Şirketa Petrolê ya Bakur li Kerkûkê  û vekirina hejmarek projeyan li bajêr de got : Kerkûk pêdivî bi projeyên veberhênanê yên zêdetir heye û em dixebitin ku bigihîjin 600,000 bermîl hilberîna petrolê di rojê de, wî derbarê Herêma Kurdistanê de got:’’ Em amade ne ku petrolê werbigirin û em ê bi ciddî bixebitin da ku di zûtirîn dem de hinardekirina petrolê ji nû ve dest pê bike.’’

Heyan Ebdulxenî îro gihîşte Kerkûkê û ji aliyê parêgarê  Kerkûkê Rebwar Taha û Serokê Meclîsa Parêzgeha Kerkûkê Mihemed Hafiz ve hat pêşwazîkirinû ragihand:"Kerkûk pêdivî bi projeyên veberhênanê yên zêdetir heye, ji ber vê yekê em ê veberhênanê di sektora sotemeniyê de zêde bikin û bixebitin ku hilberîna petrolê li Kerkûkê bigihîne 600,000 bermîl di rojê de, di heman demê de hilberîna petrolê ya niha li çar zeviyên petrolê nêzîkî 350,000 bermîl di rojê de ye.’’

Wî got:"Parêzgeha Kerkûkê pêdivî bi pêşkeftinê heye û ji bo ciwanan derfetên kar ên zêdetir biafirîne, ji bo vê yekê divê em projeyên petrolê pêş bixin, di heman demê de Îraq pêdivî bi hilberîna gazê heye.

Em amade ne ku petrola herêmê werbigirin

Derbarê Herêma Kurdistanê de, Wezîrê Petrolê yê Îraqê got:"Danûstandinên bi Herêma Kurdistanê û Wezareta Çavkaniyên Xwezayî re ji bo wergirtin û hinardekirina petrolê bi rêya SOMO berdewam dikin.’’

‘’Rojane 130,000 bermîl petrol dê were hilberandin, ku ji wê 50,000 bermîl dê navxweyî be û me li ser 80,000 bermîl li hev kiriye ku  rojane ji Herêma Kurdistanê werbigirin û bi rêya bendera Ceyhanê ji welatên din re hinarde bikin.Bi ciddî dixebitin ku hinardekirina petrolê ji Herêma Kurdistanê di zûtirîn dem de ji nû ve dest pê bike," wî got.

Parêzgar: Gelê Kerkukê dê ji projeyên BP sûd werbigire

Rebwar Taha, parêzgarê Kerkukê, ji rojnamevanan re got:"Kerkûk duyemîn parêzgeha hilberînerê petrolê ya herî mezin a Îraqê ye û roleke mezin di dabînkirina budceya Îraqê de dilîze, ji ber vê yekê vekirina kargeha BP ji bo hikûmet û parêzgeha Kerkukê destkeftiyek mezin e, ji ber ku xelkê bajêr dê ji projeyên BP sûd werbigirin.

Wî zêde kir:"Wekî hikûmeta herêmî ya Kerkukê, em piştgiriyê didin hemû projeyên ku binesaziya aborî ya bajar û şîrketên petrol û gazê pêş dixin, ji ber ku niştecihên Kerkukê dê jê sûd werbigirin.

Li gorî PUKMEDIA, armanca sereke ya serdana Wezîrê Petrolê yê Îraqê bo Kerkukê ew e ku wî kevirê bingehîn ê rafineriyeke nû li ser rêya Kerkûk-Hewlêrê li nêzîkî Gurgeçalê danî û serdana zeviya petrolê ya Cebel Bora kir, ku hilberîna xwe ji 5,000 bermîlan gihandiye nêzîkî 25,000 bermîlan.

PUKMEDIA