Operasyonên Hevbeş: Êrîşkerên ser zeviya Kormor wê werin cezakirin

Ajans

Zeviya Kormorê

Fermandariya Operasyonên Hevbeş roja Pêncşemê piştrast kir ku kesên li pişt êrîşên li ser zeviya gazê ya Kormor li Parêzgeha Silêmaniyê dê werin cezakirin.

Di daxuyaniyekê de, Fermandariya Operasyonên Hevbeş got, "Roja Çarşemê demjimêr 23:30an de, zeviya gazê ya Kormor li Parêzgeha Silêmaniyê rastî êrîşekê hat, ku di encamê de yek ji depoyên sereke yên zeviyê şewitî bêyî ku ti qurbanî hebin. Ev êrîş gefê li berjewendiyên Îraqiyan dixe û kiryareke terorîstî ya cidî ye ku armanc dike astengkirin û derengxistina hewldanên ji bo avakirina ewlehî û aramiya aborî.

Daxuyaniyê zêde kir, "Ev êrîş bandorên neyînî li ser tora elektrîkê jî dike, nemaze li parêzgehên Hewlêr û Silêmaniyê, û zirarê dide sîstema enerjiyê yên welêt. Her wiha destnîşan kir ku "kesên li pişt van êrîşan dê werin cezakirin, û tedbîrên qanûnî yên biryardar dê li dijî kesên ku di vê kiryara xayîn û tirsonek de beşdar in werin girtin." Wezaretên Çavkaniyên Xwezayî û Elektrîkê yên Herêma Kurdistanê piştî êrîşeke dronî li ser zeviya gazê ya Kormorê ragihandin ku dayîna gazê ji wêstgehên peydakirina elektrîkê re bi tevahî hatiye rawestandin.

Di daxuyaniyek hevbeş a her du wezaretan de wiha hat gotin: Hikûmeta Herêma Kurdistanê piştî êrîşa dronî li ser zeviya Kormor, hinardekirina gazê bo wêstgehên elektrîkê yên li herêmê rawestand.

Di daxuyaniyê de hat gotin ku "tîmên ji Wezaretên Çavkaniyên Xwezayî û Elektrîkê niha bi Dana Gas re di têkiliyê de ne da ku bûyerê lêkolîn bikin û operasyonên normal vegerînin.


PUKMEDIA