Komên çekdar ên ser bi Hikûmeta Demkî ve agirbestê binpê dikin

Ajans

Rojava

Komên çekdar ên Hikûmeta Demkî li Sûriyeyê, agirbesta ku duh hatibû ragihandin 4 caran binpê kirin, girtîgeha Al-Eqtan a li Reqayê, bajarê Zirganê û gundê Til Barûd ê li gundewarê Hesekê kirin armanc.

Wezareta Parastinê ya Hikûmeta Demkî li Sûriyeyê, agirbestek ji bo 4 rojan ragihand ku ji demjimêr 8:00 şevê duh ve dest pê kir. Paşê Hêzên Sûriyeya Demokratîk (HSD) pabendbûna xwe bi agirbestê ragihand û tekez kir ku heta êrîş li ser hêzên wan neyê kirin, ew dest bi tu çalakiyên leşkerî nakin.

Lê belê, agirbest di demjimêrên xwe yên pêşîn de rastî 4 binpêkirinan hat, komên Hikûmeta Demkî li Sûriyeyê zincîre êrîş birin ser deverên cuda yên Bakur û Rojhilatê Sûriyeyê.

Tenê piştî bîst deqeyan ji destpêkirina agirbestê, di demjimêr 20:20’an de girtîgeha Al-Eqtan a li Reqayê ku terorîstên DAIŞ’ê tê de ne, bi pênc êrîşên firokeyên bêmirov hat armancgirtin. Li gorî daxuyaniya Navenda Ragihandinê ya HSD’ê, di encamê de şervanek birîndar bû.
Her wiha bajarê Zirganê yê li kantona Cizîrê, di 21:11’an de rastî topbarana giran hat û di heman demê de dron di asmanê bajêr de digeriyan. Til Barûd a li başûrê Hesekê jî bi çekên giran êrîş bi ser hat kirin.
Di derenga şevê de, komên Hikûmeta Demkî li derdora bajarê Sirîn ê li başûrê Kobanê bi armanca berfirehbûnê tevgeriyan, lê derbên giran xwarin û neçar man ku vekişin.

PUKMEDIA