Serok Bafil: Helebçe birînek gelê me ye û dê her û her di dilê me de bimîne

PUKMEDIA

Helebce

Bafil Celal Talebanî, Serokê Yekîtiya Niştimanî ya Kurdistanê (YNK), di salvegera 38emîn a bombebarankirina Helebceyê bi çekên kîmyayî de daxuyaniyek weşand û bang li Hikûmeta Herêma Kurdistanê û hikûmeta Îraqê kir ku bêtir xizmetguzariyê bidin gelê wê û bajêr ji nû ve ava bikin.

Daxuyanî wiha ye:

Her sal di vê rojê de, bi rêzdarî û wefadarî, û bi dilên tijî xemgînî û êş, em trajediya êrîşa kîmyayî ya li ser bajarê şehîd Helebçeyê bi bîr tînin.

Şehîdên Helebçeyê û hemû qurbaniyên gelê me her û her di bîra me de ne. Di vê gavê de em bi serbilindî li kêleka Helebçeyê û gelê wê disekinin, û emê bi hev re ji bo misogerkirina pêşerojek geştir ji bo neteweya xwe bixebitin.

YNK xizmetkirina Helebçeyê wek erkê xwe yê domdar dibîne. Ji bo sivikkirina êşa vê trajediya mezin û jidestdana hezkiriyên me, divê Hikûmeta Herêma Kurdistanê û Îraqê ji berê bêtir xizmeta vî bajarê delal bikin, da ku em bi hev re êşa wê veguherînin hêvî, başbûn û ji nû ve avakirina bêtir. Em xemgîn in ku îsal, ji ber şer û rewşa xirab a herêmê, merasîmên fermî yên ku layiqê şehîdên Helebçeyê ne, nayên lidarxistin. Lêbelê, Helebçe birîneke ku li ser gelê me hatiye çêkirin û dê her û her di dilê me de bimîne.

Silav ji bo giyanên paqij ên şehîdên Helebçeyê û hemû şehîdên gelê me.

Bafil Celal Talebanî
Serokê Yekîtiya Niştimanî ya Kurdistanê


PUKMEDIA