Ji ber êrîşên li ser Herêmê dibistan dîsa hatin rawestandin

PUKMEDIA

Silêmanî, Hewlêr

Îro 29/3/2026an, tevî ku biryar bû dewama dibistan û zanîngehan dest pê bike, lê ji ber aloziyên li herêmê û êrîşên dronan ên li ser Herêma Kurdistanê, careke din bêhnvedan (pîşû) hat ragihandin û Wezareta Navxwe ya Herêmê jî hişyariyê dide derbarê nûçeyên nerast.

Wezaretên Xwendina Bilind û Perwerdeyê di daxuyaniyeke hevpar de, destpêkirina dewamê ji îro ve ragihandibûn, lê bêyî ku dewam dest pê bike, ji bo îro careke din bêhnvedan hat ragihandin.

Ragihandina bêhinvedanê

Parêzgehên Hewlêr, Silêmanî û Duhokê ji bo parastina ewlehiya xwendekar û mamosteyan roja Yekşemê, 29ê Adarê, ji bo dibistan, zanîngeh û peymangehên Herêma Kurdistanê wek bêhinfedana fermî ragihand. her weha rêveberiyên Raperîn, Germiyan, Zaxo û Soranê jî di nav de.

Êrîşên Berdewam

Di nav pevçûnên berdewam ên li herêmê de, çend deverên Herêma Kurdistanê rastî gelek êrîşên bi dronan hatine. Ji destpêka pevçûnan ve, Herêma Kurdistanê rastî 450 êrîşan hatiye, di encamê de 13 kes mirine û 156 kesên din jî birîndar bûne.

Tenê di 24 demjimêrên borî de bajarê Hewlêrê rastî 15 êrîşan hatiye, û duh jî mala Serokê Herêma Kurdistanê li Duhokê rastî êrîşeke bi dronan hatiye.


PUKMEDIA