Koçberan Dêra Zorê yên li Efrînê dijîn dê vegerin bajarê xwe yê resen

Medya

Civîna Parêzgarê Dêra Zorê digel berpirsên herêma Efrînê

Biryare bi sedan koçberan Dêra Zorê yên li bajarê Efrînê dijîn vegerin bajarê xwe, her weha koçberên Efrînî jî dê ji bajarên Kobanê û Qamişlo û Dêrîk û çend deverên din yên Rojavayê Kurdistanê di demek e nêzîk de dê vegerin cih û warên xwe.

Îbrahîm Şêxo Çalakvanê Rêxistina Mafên Mirovan ragihand ku parêzgarê Dêra Zorê û rêveberê herêma Efrîn civînek bi hejmarek kesayetên navdar yên Dêra Zorê yên ku li Efrîn dijîn re saz kir û têde mekanîzmaya vegerandina malbatan bo deverên xwe yên resen gotûbêjkirin.

Ji aliyê xwe ve Rewangeha Sûrî bo Mafên Mirovan jî aşkere kir ku, hejmara malbatên xelkê Dêra Zorê yên ku li bajarê Efrîn dijîn nêzîkî hezar û 500 malbat in ku mal û xaniyên koçberên Efrînî dagîr kirine.

Heman çavkaniyê aşkere kiriye ku di civînê de, pîlaneke ji bo vegerandina wan bi rêya karwanên rêxistinkirî di nav mehekê de hat gotûbêjkirin, û hikûmet dê piştgiriya darayî bide wan malbatan û wan qerebû bike.

Ev pêngav wekî beşek ji hewildanên ji bo misogerkirina vegera ewle ya malbatan bo deverên wan yên resen tê, digel lihevkirinên berdewam yên di navbera Hêzên Sûriye Demokratîk (HSD) û hikûmeta veguhêz de.

PUKMEDIA