Parlamentoya Îraqê qedandina amadekariyên dengdanê radigihîne

PUKMEDIA

Encumena Nûnerên Îraqê

Sekreterê Giştî yê Parlamentoya Îraqê Sefwan el-Cercerî, ragihand ku hemû amadekariyên ji bo lidarxistina civîna dengdana li ser kabîneya nû, ku bi serokatiya Elî el-Zeydî ye bi dawî bûne.

El-Cercerî di hevpeyvînek taybet de bi Ajansa Nûçeyan a Îaqê re diyar kir ku Parlamentoyê hemû amadekariyên ji bo lidarxistina civîna dengdana li ser kabîneyê bi dawî kirine. Got wekî ku di dengdanên berê yên hikûmetê de bûye, vexwendname ji rêberên siyasî û dîplomatîk re hatine şandin.

Wî zêde kir ku vexwendname dê roja Yekşemê ji rêberên siyasî, Çarçoveya Hevrêzkirinê û Encûmena Siyasî re werin şandin. Wî piştrast kir ku ew li benda serokatiya Parlamentoyê ne ku roja civînê destnîşan bike, çi roja Duşemê be an Sêşemê be.

Ji aliyê xwe ve, Parlamenter Dr. Biryar Reşîd ji fireksiyona Yekîtiya Nîştimanî ya Kurdistanê ji PUKMEDIA re got ku Serokwezîrê destnîşankirî Elî el-Zeydî li gorî rêkarên destûrî yên ji bo avakirina hikûmeta nû bernameya wezîran pêşkêşî Parlamentoyê kiriye. Wî zêde kir ku li gorî rêkeftinên siyasî yên berdewam ên di navbera fireksiyonên parlemanî de, diyare ku dengdana baweriyê ji bo hikûmeta nû ya Îraqê vê hefteyê pêk were.

Ji aliyê xwe ve, Parlamenter Ramyar Heyder ji fireksiyona YNK ji PUKMEDIA re got ku piraniya postên hikûmetê hatine destnîşankirin, û Kurd dê çar wezaretan werbigirin, dibe ku Wezareta Derve, Jîngeh an Perwerdehiya Bilind, Dad û Nûavakirin û Xanî be.

Amaje bi wê jî kir ku postên cîgirê serokwezîr dê ji hêla Kurd û Sunnî ve werin girtin, lê postên cîgirê serokomar dê ji hêla Sunî û Şîeyan ve werin girtin.


PUKMEDIA