Trump:Min êrîşa li ser Îranê ji bo demek kurt paşxist

Reuters

Serokê Amerîka Donald Trump

Serokê Amerîka Donald Trump ragihand ku wî êrîşa li ser Îranê paşxist daku şansek bide dîplomasiyê, û tekez kir ku artêşa Amerîka di hişyariyê de dimîne eger danûstandinên Etomî yên berdewam bi ser nekevin.

Trump: Danûstandinên bi Îranê re pêşketineke gelekî erênî ye

Serokê Amerîka Donald Trump got:Danûstandinên bi Îranê re pêşketineke gelekî erênî ye piştî ku wî biryar da ku êrîşa leşkerî ya pîlankirî ya li dijî rêveberiya Tehranê paş bixe daku cîh ji bo hewldanên dîplomatîk veke.

Di çalakiyekê de li Koşka Spî, Trump dazanîn ku serkirdeyên Îmaratên Erebî yên Yekbûyî, Erebistana Siûdî û Qeterê jêre gotine ku şansê gihîştina rêkeftinekê bi Îranê re nêzîk e, û hêviya xwe anî ziman ku êrîş heta hetayê were paşxistin.

Serokê Amerîka tekez kir ku welatê wî dê razî bibe eger rêkeftinek were kirin ku rê li ber Îranê bigire ku çeka etomî bi dest bixe, di heman demê de destnîşan kir ku wî ferman daye artêşa Amerîka ku di amadebaşiyê de bimîne daku êrîşek berfireh  pêk bîne eger danûstandin bi ser nekevin.

Li hemberî wê yekê jî, Îranê ragihand ku wan bersiva xwe ya ji bo pêşniyara Amerîkî bi rêya navbeynkarê Pakistanî şandiye, di heman demê de berdevkê Wezareta Derve ya Îranê Îsmayîl Beqayî berdewamiya danûstandinê bi Washingtonê re piştrast kir, di heman demê de tekez kir ku Tehran pabendî mafên xwe ye.

Pizîşkiyan:Diyalog nayê wateya teslîmbûnê

Ji aliyê xwe ve, Serokkomarê Îranê Mesûd Pizîşkiyan got ku diyalog nayê wateya teslîmbûnê , û tekez kir ku Îran di çi mercan de dest ji mafên xwe yên yasayî bernade.

Ev yek di demekê de ye ku, Reutersê ji çavkaniyek Pakistanî veguhest ku dibêje Îslam Ebadê pêşniyarek Îranê ya sererastkirî daye Washingtonê, lê destnîşan kir ku nakokiyên di navbera her du aliyan de li ser gelek mijaran berdewam in, di nav hişyariyan de ku dem ji bo gihîştina rêkeftinekê bi dawî dibe.

PUKMEDIA