Fraksiyona YNKê mîna xazê hewla çareserkirina pirsgirêka Benzînê dide

Arşîv

Benzîn

Li ser daxwaza Fraksiyona YNKê, Wezareta Neftê ya Iraqê xaz ji bo Herêma Kurdistanê şand, Biryardera Fraksiyona YNKê li Encumena Nûneran a Iraqê jî dibêje: Wan daxwaznameya şandina benzînê jî radestî wezaretê kiriye.

Sirwe Mihemed, biryardera Fraksiyona YNKê li Encumena Nûneran a Iraqê ji malpera fermî ya Yekêtiya Niştimaniya Kurdistanê (PUKMEDIA) re axivî û ragihand: "Di van rojên borî de ji ber rawestana karên Dana Gasê li kêlgeha Kormorê, metirsiya çêbûna qeyrana xaza malan li Herêma Kurdistanê hebû. Ji ber wê jî me wek erka xwe dît û me ji Wezareta Neftê ya Iraqê daxwaz kir ku xazê ji bo parêzgehên Herêmê bişîne."

Her wiha got: "Bi spasiyeke mezin, daxwaza me ji aliyê Birêkarê Wezîrê Neftê Dr. Îzet Sabir ve tavilê hat cîbicîkirin û di nav çend rojên kêm de karîn xazê bişînin Herêmê. Vê gavê ku bihayê benzînê li parêzgehên Herêmê ber bi bilindbûnê ve diçe, me daxwaznameya xwe ji bo dabînkirina benzînê jî pêşkêşî Birêkarê Wezîrê Neftê kiriye, bi mebesta dabînkirina benzînê ji bo parêzgehên Herêma Kurdistanê da ku bihayê wê bête daxistin."

Biryardera Fraksiyona YNKê bal kişand ser wê yekê jî ku wan bi rêya fraksiyona xwe projeyek ji bo daxistina bihayê benzîn û sotemeniyê li parêzgehên Herêmê amade kiriye. Wê got: "Tewra ku mîna parêzgehên din ên Iraqê jî nebe, divê ferqa bihayê ewqas zêde nebe. Ji bo vê mîsoger bibe, em dê projeya xwe bi Serokatiya Encumena Nûneran re guftûgo bikin; çûnkî mijara bihayê benzînê heta astekî bilind bi rêkeftina navbera her du hikûmetan ve girêdayî ye."

Ev di demekê de ye ku ev du roj in bihayê benzînê li parêzgehên Herêma Kurdistanê bi awayekî berçav bilind bûye, û îro lîtreya benzîna normal di navbera 1200 heta 1500 dînarî de ye û ya super jî di navbera 1750 heta 1950 dînarî de tê firotin. ev di nav çend salên borî de cara yekem e ku bihayê wê bi vê pîvanê firiya ye, bi awayekî ku li ser her lîtreyekê 350 heta 500 dînar zêde bûye.

PUKMEDIA