SerokKomar: Bicihanîna dadperwerî ji bo Êzidiyan û jinûveavakirina Şengalê erkekî nîştimanî û exlaqî ye

PUKMEDIA

Serokkomarê Îraqê

Serokkomarê Nîzar Amêdî, di 12emîn salvegera jenosîda Êzîdiyan de daxuyaniyek weşand, û tekez kir ku bicihanîna dadperweriyê ji bo wan erkekî nîştimanî û exlaqî ye. Her wiha wî banga vegerandina koçberan û jinûveavakirina Şengalê kir.

Ev naveroka daxuyaniyê ye:
Di 12mîn salvegera jenosîda Êzidiyan de, em li beramberî yek ji sûcên herî hovane yên ku Îraqê di dîroka xwe ya nûjen de dîtine radiwestin. Terora DAIŞê ne tenê kuştina mirovên bêguneh armanc dikir, lê belê hewl da ku hebûna Êzidiyan ji holê rake û ev yek bi rêya kuştin, destdirêjî, koçberkirin û wêrankirinê pêk anî, ev sûc dê her tim wekî lekeyeke reş di wijdana mirovahiyê de bimîne.
Lê belê xelkê me yê Êzidî îsbat kir ku vîna jiyanê ji terorê bihêztir e, wan tevî êş û azaran li ber xwe dan û bi xak, nasname û mafê xwe yê jiyaneke serbilind ve girêdayî man.

Ji roja ku me bi şanazî berpirsyariya Serokatiya Komarê girtiye stûyê xwe, me ev dosye xistiye rêza yekem a karên xwe yên li pêş. Ji ber ku em bawer in, dayîna heq û mafên Êzidiyan ne pirsek e ku tenê bi pêkhateyekê ve girêdayî be, lê belê ew mafekî nîştimanî û exlaqî ye ku bi rûmeta hemû Îraqê ve girêdayî ye. Tiştê ku îro ji bo vê dosyeyê pêwîst e, biryarên wêrek û gavên pratîkî ne daku dawî li êş û azara zêdetirî deh salan bînin.

Bêguman vegera hemû koçberan bo warên wan, eşkerekirina çarenivîsa revandî û windabûyan, jinûveavakirina Şengalê û hemû navçeyên ziyandîtî, qerebûkirina qurbaniyan û dabînkirina jiyaneke aram û bi rûmet ji wan re, divê bibin armancên rasteqîn û pêkan. Ji ber ku berdewamiya bandorên vê karesatê piştî zêdetirî deh salan tiştekî nayê qebûlkirin e, û dadperwerî pêk nayê heta ku Êzidî mafên xwe bi temamî bidest nexin.
Nîzar Amêdî
Serokkomar
 Duşem 3yê Tebaxa 2026

PUKMEDIA