Keştiyên ku petrola Îraqê barkiribûn di Hurmizê re derbas bûn

AFP

Gewriya Hurmiz

Wezareta Petrolê ya Îraqê ragihand, ew keştiyên ku petrola Îraqê hilgirtibûn, bi selametî di Tengava Hurmizê re derbas bûn û da zanîn ku ew di firotina petrola xav de berdewam in, herwiha firotina meha borî ji mehên berê baştir bûye.

Berdevkê Wezareta Petrolê ya Îraqê Selîm Rîkabî ragihand, tevgera veguhastina petrola xav a Îraqê bi rêya Tengava Hurmizê ve berdewame û keştiyên wan ên petrolhilgirtî bi awayekî asayî di tengavê re derbas dibin.

Navhatî amaje bi wê yekê jî kir, piştî derbasbûna di tengavê de berpirsiyariya rêça keştiyan û wergirtina destûrên pêwîst û proseya veguhastinê bi temamî dikeve stuyê kiryaran û wezaret ne xwediyê wan keştiyane ku beşek ji wan barê wan du milyon bermîl nefte.

Berdevkê Wezareta Petrolê behsa wê yekê jî kir ku; Kompaniya Bazarkirina Neftê ya Iraqê (SOMO) rasterast bi rêya sîstema cîhanî ya çavdêriyê ve dûvçûna tevgera keştiyan dike heta ku digehêjin parzûngehan.

Derbarê asta hinardekirinê de jî, navhatî tekez li ser bilindbûn û başbûna gav bi gav a firotina petrola Îraqê kir di mehên dawî de û ragihand, encamên firotina meha borî ji mehên berê çêtir bûne, ev jî nîşaneya başbûna berdewam a asta hinardekirinê ye li beramberî wê qonaxa ku piştî qeyrana hinardekirinê bi rêya Tengava Hurmizê re derket holê.

Ev di demekê de ye ku duh 3yê Tebaxa 2026an, Wezîrê petrola Îraqê ragihand ku ew di gotûbêjê de ne li gel Îranê daku keştiyên wan ên nefthilgirtî Tengava Hurmizê derbas bikin.

PUKMEDIA