NY:DAIŞ hîna jî gefeke li ser aştî û ewlehiya navneteweyî

UN

Ogulgerîn Niyazberdieva

Neteweyên Yekbûyî hişyarî da ku DAIŞ hîna jî gefek cidî ye li ser aştî û ewlehiya navneteweyî, û tekez kir ku rêxistin - tevî operasyonên dijî-terorê yên berdewam ku rêveberiya wê ya payebilind têk biriye û şiyana wê ya rêvebirina operasyonan bi awayekî navendî kêm kiriye lê ew digel guhertinan xwe diguncînin.

Ogulgerîn Niyazberdieva, Rêvebera Ofîsa Cîgirê Sekreterê Giştî yê Wekîl yê Ofîsa Têkoşîna li dijî Terorê ya Neteweyên Yekbûyî, raporta bîst û sêyemîn ya Sekreterê Giştî li ser gefên DAIŞê yên li ser aştî û ewlehiya navneteweyî nirxand û bal kişand ser hewldanên Neteweyên Yekbûyî ji bo piştgiriya welatên endam di rûbirûbûna vê gefa pêşkeftî de.

Li gorî raportê, çend şaxên DAIŞê şiyanên xwe xurt kirine, operasyonên xwe berfireh kirine û taktîkên xwe pêş xistine. Dewleta Îslamî ya Parêzgeha Rojavayê Afrîkayê (ISWAP) hîna jî şaxê herî çalak ê DAIŞê li cîhanê ye û şiyana xwe ya bidestxistin û bikaranîna dronên bazirganî zêde kiriye.

Sûriye, Îraq û Başûrê Asya

Berpirsa NY bal kişand ser pêşketinên li Sûriyê, ku guhertinên siyasî û ewlehiyê berdewam dikin ku hawîrdora gefê ji nû ve şekil didin, Xanim Niyazberdiyeva destnîşan kir ku girtina kampa El Hol di Sibata borî de fikarên ewlehiyê yên mezin derxist holê, ji ber ku cihê bi hezaran kesan hîna jî nayê zanîn.

Îraq

Derbarê Îraqê de jî ragihand ku fişarên berdewam yên dijî-terorê şiyanên DAIŞê bi girîngî kêm kirine, lê tekez kir ku parastina van destkeftiyan saziyên bihêz û berpirsiyar, rêveberiya dadweriyê ya bi bandor, bernameyên rehabîlîtasyon û ji nû ve vejînê, û her weha çareserkirina şert û mercên ku dikarin rê bidin rêxistinê ku çalakiya xwe ji nû ve bi dest bixe, hewce dike.

Başûrê Asya

Li Başûrê Asyayê, DAIŞ yê Xorasanê yek ji şaxên herî jêhatî yên rêxistinê dimîne, ji ber ku ew niyet û şiyana xwe ya piştgirîkirin yan îlhamkirina êrîşên li derveyî Efganistanê nîşan dide, di heman demê de ji bê aramiya herêmî sûd werdigire daku endamên nû peyda bike, operasyonên xwe plan bike û çalakiyên xwe bidomîne.

Hevkariya navneteweyî pêwîstiyeke lezgîn e

Ogulgerin Niyazberdiyeva got ku parastina pêşketinê di şerê li dijî DAIŞê de hewceyê berdewamiya hewldanên pêşîlêgirtinê, xurtkirina hevkariya navneteweyî û herêmî, û pejirandina bersivên berfireh li ser bingeha yasaya navneteweyî ye.

Piştgiriya qurbaniyan û pêşvebirina çalakiyên navneteweyî

Beriya Roja Navneteweyî ya Bîranîn û Rêzgirtina li Qurbaniyên Terorê ku dikeve 21ê Tebaxê û îsal mijara wê "Şifakirin bi bîranînê" ye;xanim Niyazberdiyeva rêz li qurbanî û saxmayîyên terorîzmê li çar aliyên cîhanê girt û got:Wêreki û berxwedana wan bi bîr tîne ku terorîzm li ser mirovan çiqasî bandorê dike, û berpirsiyariya me ya kolektîf li hember kesên ku jiyana wan ji ber tundûtûjiya terorîstî her û her guheriye.

Her weha got:Ofîsa Têkoşîna li dijî Terorê ya Neteweyên Yekbûyî dê çalakiyek asta bilind ji bo pîrozkirina vê bûyerê li dar bixe, di nav de şahidiyên qurbaniyan û yên saxmayî, peyamên rayedarên payebilind yên Neteweyên Yekbûyî, û deqeyek bêdengiyê ya cîhanî.

PUKMEDIA