Hikûmeta Îraqê: Mûçeyên karmendan misogerin û serî li deynên derve nadin

ajans

Berdevkê Hikûmeta Îraqê Heyder El-Ebûdî

Berdevkê Hikûmeta Federal a Îraqê Heyder El-Ebûdî di daxuyaniyekê de tekez kir ku mûçeyên karmendên dewletê bi temamî di garantiyê de ne û ew nûçeyên ku dihatin gotin "dê mûçe her 40 rojan carekê werin belavkirin" bi tu awayî rast nînin.

Di kongireyeke Rojnamevanî de ku PUKMEDIA ew şopand, El-Ebûdî da zanîn ku tevî krîza aborî ya heyî jî, hikûmetê heta niha serî li deynên derve nedaye, û diyar kir ku Wezareta Darayî û Banka Navendî bi awayekî hevseng dixebitin da ku rê li ber bandorên krîza aborî bigirin.

Derbarê rewşa ewlehiyê li Îraqê de jî, Berdevkê hikûmetê diyar kir ku di navbera aliyên pêwendîdar de gotûbêj berdewam dikin da ku dosya çekan bi temamî bikeve bin kontrola dewletê. Wî tekez kir ku dewlet li gorî nexşerêya diyarkirî, heta dawiya meha Îlonê dê hemû hêz û çekan bixe destê xwe.

Her wiha di daxuyaniyê de hat destnîşankirin ku Fermandarê Giştî yê Hêzên Çekdar ferman daye saziyên peywendîdar ku sîstemên berevaniya ezmanî bi temamî werin parastin û ewlekirin. Ligel vê yekê, di navbera Îraqê û Hêzên Hevpeymana Navneteweyî de hevrêziyeke ewlehiyê ya birêkûpêk heye daku di 30ê Îlona bê de, hemû ew cihên ku niha di bin destê hêzên hevpeymanan de ne, werin radestkirin.

Di aliyê aborî û wizeyê de jî, Heyder El-Ebûdî anî ziman ku hinardekirina petrola Îraqê ji ber girtina Tengava Hormizê zirar dîtiye. Ji ber vê yekê, hikûmeta Îraqê rê û derfetên nû bi Tirkiyê re danîne da ku xetên borî yên stratejîk û projeyên nû ava bikin, bi armanca ku dahat û budçeya dewletê bilind bikin.

PUKMEDIA