Erdheja Kolombiya.. Hewldanên rizgarkirinê gihîştine qonaxên dawî

AP

Erdheja Kolombiya

Îro li Kolombiyayê, dema zêrîn a 72 demjimêrî ji bo dîtina qurbaniyên erdhejê bi dawî bû, û tîmên rizgariyê xebatên xwe zêdetir kirin da ku alîkariya hezaran kesên ku ji erdheja herî wêranker a vê sedsalê li vî welatî bandor bûne, bikin.

Tîmên rizgariyê bi awayekî herî jêhatî li bajarên ziyangihayî yên wekî Cali û Pereirayê berdewam bûn li lêgerîn û pişkinînê, ev yek di demekê de bû ku di berbangiya îro Pêncşemê, 13ê Tebaxa 2026an de, ew demdirêjiya ku bi "72 demjimêrên zêrîn" dihat naskirin bi dawî hat, ji ber ku dihat çaverêkirin ku ew dem derfeta herî mezin bide ji bo dîtina qurbaniyan di bin kavilan de.

Ev erdheja ku bi mezinahiya 7.4 pileyî Kolombiya hejand, wekî erdheja herî xurt a ku di vê sedsalê de li Kolombiyayê qewimî ye tê dîtin, û bû sedema mirina 265 kesan, birîndarbûna zêdetirî 3 hezar û 500 kesên din, her wiha li gorî amarên fermî nêzîkî 500 kes jî winda ne.

Li hemberî vê karesata mezin, Serokê Kolombiyayê (Ebilardo de la Espriella) ku di hefteya borî de dest bi erkê xwe kiribû, ji bo sê rojan şîna neteweyî ya giştî ragihand û di gotarekê de tekez kir ku hikûmet dê hemû tedbîrên pêwîst bigire, û di heman demê de soz da ku welat û civak careke din bên avakirin.

Amarên fermî nîşan didin ku zêdetirî 11 hezar xaniyan bi temamî hilweşiyane û hezaran malbat bêmal man, rewşa awarte li bajarên Cali, Pereira, Quibdó, Manizales û Armirê ku serokê Kolombiyayê behsa wan kiribû, didome.

Ji ber tirsa ji paşlerzan û ziyanên li ser xaniyên wan, gelek welatî neçar man ku çend şevan li derve û li ser kolanan derbas bikin, bo nimûne, li taxa Providencia ya bajarê Pereirayê, niştecihan kelûpel û alavên malên xwe ji nava avahiyên ziyanbîr derdixistin.

Li gel vê karesatê, giyanê hevkarî û alîkariyê di nava civaka Kolombiyayê de diyar bû, bi awayekî ku hejmareke mezin ji welatiyan bi dilxwazî dest avêtin veguhastina av, xwarin û pêdiviyan ji bo taxên ku ziyan dîtine, û gelek xelk jî ji bo bexşîna xwînê berê xwe dan navendên bexşîna xwînê.

Di asta navneteweyî de, Amerîkayê alîkariyeke lezgîn bi nirxê 15.5 milyon dolar pêşkêşî Kolombiyayê kir, û Yekîtiya Ewrûpayê soz da ku 2 milyon euro (ku dike nêzîkî 2.3 milyon dolar) wekî alîkarî bide Kolombiyayê.

Ev yek di demekê de ye ku di roja 11ê Tebaxa 2026an de erdhejekê bi mezinahiya 7.4 pileyî Kolombiya hejandibû.

PUKMEDIA